Мындан алда республиканы Зеленчук районунда Сторожевой стансени 1-чи номерли школунда агроном усталыкъгъа окъутхан класс къууанч халда ачылгъанды.

Аллай классны ачылыууну баш мураты сабийлени эл джашау бла, джерчилик бла шагъырей этиб, алагъа эл мюлк усталыкъ алдырыуду.
«Ол къууанч ишге келгенлени арасында Сторожевой стансени администрациясыны тамадасыны орунбасары Алексей Балановский, Зеленчук муниципал районну окъуу управлениесини тамадасыны борчларын кёзюулю толтургъан Надежда Игнатович, «Сторожевский» совхозну баш агроному Алийланы Къара эмда башхала болгъандыла. Ала, сабийлени джангы агроклассха киргенлери бла алгъышлаб, башхаладан айырылыб белгили болур ючюн, ол классха джюрюрюклеге джашил галстукла къысхандыла», – деб билдиреди Зеленчук муниципал районну пресс-къуллугъу
Къууанч джыйылыу бошалгъандан сора, бу классха джюрюрюкле школну теплицасында урлукъ салгъандыла.
Республикада быллай 12 агрокласс ачыллыкъды, алада орта билим берген школланы 5-чи – 11-чи классларындан 200 сабий окъурукъду.
Бизни республикада орта билим берген школлада сабийлени эл мюлк бла байламлы этер ишлери «Аграрный класс» деген миллет проектни джашаугъа киргизген кёзюуден, 2024-чю джылны аллындан, башланнганды. Окъуучула ол проектни тамалында эл мюлк усталыкъла бла танышадыла, теория эмда практика ишле бардырадыла, агропромышленностну предприятиелерине экскурсияла къурайдыла.
Аграр классланы программаларыны тамалында сабийлеге сейир дерсле, практика ишле, предприятиелеге аламат экскурсияла, мастер-классла бардырылыб, аланы эл мюлк усталыкъла бла терен шагъырей этерикдиле.

АЛЧАКЪЛАНЫ Х.