Мындан алда Къарачай-Черкес Республиканы Башчысы Темрезланы Рашид Федерал налог къуллукъну КъЧР-де управлениесини коллегиясыны къууанч джыйылыууна къошулду.

Ол иш Эресейни Налог органларыны къуллукъчуларыны кюнюне аталыб бардырылды. Ары келгенлени арасында Къарачай-Черкес Республиканы Халкъ Джыйылыууну (Парламентини) Председатели Александр Иванов, Къарачай-Черкесияда Баш федерал инспектор Тимур Макоев, Къарачай-Черкес Республиканы Правительствосуну Председателини орунбасары Сюйюнчланы Мурат, Федерал налог къуллукъну Къарачай-Черкесияда управлениесини тамадасы Текеланы Расул бар эдиле.
Темрезланы Рашид кесини сёзюнде чертгенден, бу Федерал къуллукъ кърал институтланы эм магъаналыларыны бирине саналады, файдалы ишлени этеди. Бизни къралда финансла бла экономиканы таб къуралыуларына, ала бирча тыйыншлы дараджада турурларына къайгъырады, къралда, регионлада социал-экономиканы ёсюмюне себеб бола, хайыр тюшюрген базаны къураргъа джарайды.
«Бизни миллет Башчыбыз Владимир Владимирович Путин ишни юсю бла Федерал налог къуллукъну тамадасы Даниил Егоров бла тюбешгенди. Ол регионал командалада болум иги болгъаныны, аланы усталыкъларыны, ишни таб къурагъанларыны хакъындан сёлешгенди. Бизни Къарачай-Черкес Республиканы командасына уа, артыкъ сый бериб, аны эм игилени бирине санагъанды», – деди Темрезланы Рашид.
Къарачай-Черкес Республиканы Башчысы алайда алчылагъа кърал саугъала да берди. Талай адамгъа «КъЧР-ни махтаулу экономисти» деген сыйлы атла аталды. Александр Иванов, Сюйюнчланы Мурат, Текеланы Расул да ведомствону къуллукъчуларына сыйлы саугъала, грамотала, бюсюреу къагъытла бердиле.
Бюгюнлюкде Къарачай-Черкесияда налог къуллукъда хар зат белгиленнген мардада бардырылады. Джыйылгъан налогланы саны ёседи. Тёлеу система да, адамлагъа таб, тынч болурча къуралгъанды.
Темрезланы Рашид Федерал налог къуллукъну Къарачай-Черкесияда управлениесини тамадасы Текеланы Расулгъа, аны командасына, ишни таб къурагъанлары ючюн, бюсюреу этиб, кючлю саулукъ, рахатлыкъ, мамырлыкъ, джангы джетишимле теджеди.