Бу кюнледе КъЧР-ни Башчысы Темрезланы Рашид КъЧР-ни Халкъ Джыйылыууну (Парламентини) депутаты, алгъаракълада аскер къаугъагъа къошулгъан Мутчаланы Дахир бла тюбешгенди.

Мутчаланы Дахир Суворовну, «Ётгюрлюгю ючюн», «За службу на Кавказе», «За ратную доблесть» деген медалла бла саугъаланнганды. Ауур джаралы болгъанындан сора, ол юйюне къайтханды. Ызы бла «Бирикген Эресей» партиядан КъЧР-ни Парламентине депутат болуб сайланнганды. Бюгюнлюкде Мутчаланы Дахир КъЧР-ни Парламентини Кеси башларына оноулу джергили управлениени хакъындан комитетини председателини орунбасары къуллукъну толтурады.
КъЧР-ни Башчысы Темрезланы Рашид СВО-ну ветеранларыны ассоциациясыны Къарачай-Черкесияда регионал бёлюмюню тамадасы къуллукъгъа Мутчаланы Дахирни кандидатурасын джакълагъанды.
«Бу иш аскер къаугъагъа къошулгъанла бла, аланы юйдегилерине болушлукъ этиу бла байламлыды. Правительствону къуллукъчулары, депутатла, шахарла бла районланы башчылары, аскерчилени кеслери бла да къысха байламлылыкъ джюрютюу ишни кереклисича бардырыргъа мадар берликди», – дегенди Темрезланы Рашид.
Республиканы Башчысы айтхандан, Мутчаланы Дахирни джашау эмда иш сынамы КъЧР-ни Парламентинде ишин джетишимли бардырыргъа себеблик этерикди.
«Мутчаланы Дахирни граждан тирилигин эсге алсакъ, ол республиканы школларына, джаш тёлю коллективлерине къонакъгъа барыб, патриотизм бла байламлы тюбешиуле бардырлыгъына сёз джокъду. Аны аскер джолу, туугъан джуртуна, къралына сюймеклиги ёсюб келген джаш тёлюге ашхы юлгюдю», – деб къошханды Темрезланы Рашид.