Адам улу джаратылгъанлы бери Дунияда не тюрлю ашхылыкъла да ананы «джокъдан бар этелген» къудурети бла байламлыдыла. Хар не игиликге да кёз ачдыргъан аналадыла.
Эресей Федерацияны Президенти хар джыл сайын абыстол (ноябрь) айны ахыр ыйых кюнюнде Ананы кюнюн белгилерге деген Указгъа 1998-чи джыл башил (январь) айны 30-да къол салгъанды. Андан бери бизни къралда Ананы кюню, джамагъат багъалатхан эм сыйлы байрамланы бири болуб, хар джыл сайын да белгиленеди. Ол джарыкъ байрам джууукълаша тебрегенлей, бютеу къралда аналаны кёллерин джарытыргъа джораланнган ишле асламыракъ этилиб башлайдыла. Биз да газетни бетлеринде ана борчларын махтаулу толтуруб, юлгюлю балала ёсдюрген тиширыулагъа сый, махтау беребиз. Юйлерине къууат сала, сайлагъан усталыкъларында джигер урунургъа джетишген тиширыулагъа уа бютюн да уллу бюсюреу этебиз.
Аппаланы Асхатны къызы Алла, ма аллай, юйдегисине да ана джылыуун бере, ишин да тамамлы баджаргъан тиширыуланы бириди.
Алла Сюдю приставланы федерал къуллугъуну Къарачай-Черкесияда управлениесини Джёгетей Аягъы районда органларында ишлегенли 25 джылгъа джууукъ болады.
Ишин да бет джарыкълы толтура, ол баш иеси Гочияланы Исса бла бирге аламат юйдеги къурагъанды. Ала бир-бирлерин багъалата, келишиулю джашагъанлы 20 джылгъа джууукъ болуб барады. Алла, сюдю пристав болуб, Исса да Къарачай шахарда стоматология поликлиникада техник болуб, ишлерине толу берилселе да, юч ариу къызны ариу ёсдюрюрге джетишедиле.
Аланы къызлары Евелина, Лейла эмда Регина Джёгетей Аягъы шахарны 1-чи номерли лицейинде айырмагъа окъуйдула. Ала, сохталаны араларында бардырылгъан тюрлю-тюрлю олимпиадалагъа, конкурслагъа къошулуб, алчы орунланы алыб, аталары бла аналарын къууандырадыла.
Евелина кёб болмай къарачай халкъны кёчгюнчюлюгюне аталгъан тинтиу иши бла республикан дараджада бардырылгъан эришиуледе хорламлы болгъанды. Фахмулу къыз тинтиу ишинде къарт анасы Къаракетланы Роза миллетибиз бла бирге ол къыйын джыллада сынагъанны ачыкълагъанды.
«Атам Аппаланы Алийни джашы Асхат бла анам Къаракетланы Маулутну къызы Роза тюзлюкню сюйген, келишиулю адамла эдиле. Атам Джёгетей Аягъы шахарны 2-чи номерли межгитини имамы эди. Экиси да ислам динни джорукъларын да, миллетибизни ашхы адетлерин да сакълаугъа уллу магъана бере эдиле. Ала меннге да, эгечлерим Зульфия бла Бэлагъа эмда къарнашым Альбертге ашхы юлгю болгъандыла. Энди биз да, аладан кёргенибизча, тюзюуюн джашаргъа кюрешебиз», – дейди Алла.
Ол, кесине махтау чакъырмаса да, анасыча, юлгюлю ана болгъанын, 3 ариу къызын да адебли ёсдюргенин бютеу миллет кёреди.
Аппаланы Алла къуру кесини сабийлерине къайгъырмайды. Ол ишде да ата неда ана джакъсыз къалгъан сабийлени джарсытмаз джанындан кюрешеди. Аны къуллукъ борчлары алимент тёлемегенлени джууабха тартыу бла байламлыдыла да, ол джаны бла Алланы этген ишлерине уллу багъа бериледи.
Аппаланы Алла 2015-чи – 2017-чи джыллада Къарачай-Черкесияда, 2017-чи – 2019-чу джыллада да ШКФО-да сюдюле чыгъаргъан бегимлени эм иги толтургъан сюдю пристав болгъанды.
Быйыл да анга, алиментле бла байламлы ишлени иги баджаргъаны ючюн, «Къарачай-Черкесияны эм иги сюдю приставы» деген ат аталгъанды.
Алла сюдю чыгъаргъан бегимлени толтуруугъа ишге къарагъанча къарамайды, ол аланы хар биринде алиментлерин алыр амалтын сабийле джукъ керекли боладыла деген оюм бла къарайды. Хар ишине керти кёлю бла къайгъырады. Алимент тёлеулери болгъанла бла тюбешиб, Алла аланы хар бирини да сабийине къарагъан, джарагъан баш борчу болгъанын ангылатыргъа кюрешеди.
Аны акъыл сёзлери кёблеге эс джыйдырадыла. Алла бла тюбешгенден сора, ишге кириб, юйдегилерине сом-шай тёлеб башлагъанла бек кёбдюле.
Алай махтаулу ишлеген сюдю приставны тамадалары да сыйын кёредиле, багъалатадыла. Ала берген кърал саугъала Алланы этимлилигине, ишине тамам хакъ джюреги бла берилгенине шагъатлыкъ этедиле. Аны саугъа хазнасында Эресейни ФССП «За службу» деген II-чи, III-чю дараджалы медалла, «Лучший дознаватель» деген хурмет белги, аны кибик башха кърал саугъала бардыла.
Алай болса да, Алла аладан эсе, юйдегилери чачылгъан адамланы сабийлерине къараргъа, алагъа ачха бла болушургъа кёллендирелсе, анга бек къууанады. Бютеу сабийле да, юслери-башлары джарсымай, кёллери токъ ёсселе излейди. Алай болдурур ючюн, ол кесини къолундан келгенни аямай этеди.
Биз алчы сюдю приставгъа джууаблы къуллугъунда джангы джетишмле теджейбиз. Къуллукъ борчларын мийик дараджада толтура, ариу халили, кирсиз иннетли сабийлени ёсдюрген Алла Асхатовнагъа да, башха аналагъа да, балаларыгъыздан къууаныгъыз деб, алгъыш этебиз.
БАЙРАМКЪУЛЛАНЫ Зульфия.
