Къарачай-Черкесияда «Городская среда» деген проектни тамалында 400 чакълы бир арбаз эмда адамла аслам барыучу джер джарашдырылгъанды.

Черкесск шахарда 2025-чи джыл, планда белгиленнгенине кёре, 25 кёб фатарлы юйню арбазын таб да, айбат да этерикдиле. Бу проект джашаугъа сингдирилирден алгъа кёб этажлы юйледе джашагъанла бла оноулашадыла. Алай бла, ала излеген арбазлада, кёбчюлюк джыйылыучу джерледе ремонт ишле башланадыла.
– Карл Маркс атлы орамны 25-чи номерли юйюнде эмда Некрасов атлы 3-чю эмда 3-чю А номерли юйледе джашагъан адамла бла КъЧР-ни Парламентини депутатлары (партпроектни регионал координатору Алексей Ганшин, «Бирикген Эресей» партияны джергили исполкомуну тамадасы Джаммаланы Руслан), Черкесск шахар Думаны депутатлары Альберт Дзугаев бла Карабек Тлябичев, республикан аралыкъны мэриясыны фатар-коммунал мюлк управлениесини фатар бёлюмюню келечилери дизайн-проектни сюзгендиле. Ала джамагъатны макетле бла шагъырей этгендиле, къалайда къаллай ишле этилликлерин айтхандыла, адамланы оюмларына да тынгылагъандыла, - деб билдиргендиле Черкесск шахарны мэриясыны пресс-къуллугъунда.
Карл Маркс атлы орамда джашагъан адамла, багуш къуйгъан бёчкелени асламыракъ этигиз, алайгъа эркин джюрюрча мадарны къайгъысын да кёрюгюз, деб аманат салгъандыла.
– Кёб этажлы юйледе джашагъан сабийле ойнарча майданчыкъла, машинала тохтаучу, къурукъла тагъылгъан джерле да джарашдырыллыкъдыла. Айхай да, терекле, гокка хансла ёсерик джерле да белгиленнгендиле, – деб къошхандыла пресс-къуллукъну келечилери.
Талай кюнню ичинде фатарлада джашагъанла энтда дизайн-проектни тюрлендирирге, джангы затла къошаргъа боллукъдула.