Къарачай-Черкес Республиканы Башчысы Темрезланы Рашидни башламчылыгъы бла Къарачай-Черкесияда джангы уллу межгит ишлер мурат барды. Ол Бердиланы Исмаил хаджини атын джюрютюрюкдю.

– Межгитге 2500 адам сыйынныкъды. Аны Къарачай шахаргъа кирген джерде ишлерикдиле. Мекямны бухар шекелли ишлер мурат барды, – деб хапар айтхандыла Къарачай-Черкесияны Муслиманларыны дин управлениесини пресс-къуллугъунда.
Аны бла да къалмай, республиканы Башчысы КъЧР-де Муслиманланы дин управлениесини мекямын ишлеуню да тыйыншлы кёргенди.
– Юч этажлы мекям боллукъду ол. Кесин да Черкесскеде ишлер умут барды. Аны ичинде уллу залы, кабинетлери, хант юйю, къонакъ юйю боллукъдула, – деб къошхандыла Къарачай-Черкесияны Муслиманларыны дин управлениесини пресс-къуллугъунда.
Республиканы Муслиманларыны дин управлениесинде джангы комитетле да къуралгъандыла – джаш тёлюню ишлерини, хаджиликге барыуну эмда ислам билим алыуну хакъындан. Къарачай-Черкес Республиканы къадысы къуллукъгъа Ёзденланы Алий салыннганды.
Аны тышында да республиканы Муслиманларыны дин управлениесини келечилери абыстол (ноябрь) айны 1-чи кюнюн КъЧР-ни Уммасыны бирлик кюню этиб баямлагъандыла.