Бизни республикада аскер-социал аралыкъ ачылгъанды.
Аскер къуллукъларын бардыргъанла энди «Ата джуртну къоруулаучула» фондну джергили бёлюмюнде кеслерини джумушларын тындырыргъа боллукъдула. Бу аралыкъ Эресей Федерацияны Къоруулау министерствосуна къарайды.
Аскер-социал аралыкъны баш борчу аскер къуллукъда болгъанланы эмда аланы юйдегилерини тилеклерин, излемлерин толтурууду. Алагъа тыйыншлы ачха заманында берилгенине, таблыкъла бла къалай хайырланнганларына, медицина бла байламлы эмда фатар-турмуш болумлары къалай болгъанларына къарауду, керек болса, алагъа кереклисича болушлукъ табдырыуду.
– Бу аралыкъны ачылгъаны аскерчилеге бек иги болгъанды. Мындан ары ала эмда юйдегилери дженгил заманны ичинде керекли джумушларын тындыраллыкъдыла. Тыйыншлы органлагъа кеслерини сёзлерин ётдюраллыкъдыла, – деб хапар айтханды «Ата джуртну къоруулаучула» фондну джергили бёлюмюню тамадасы Абазалыланы Марат.
Аскерчиледен эмда аланы юйдегилеринден тюшген тилек къагъытланы къайсы бири да тыйгъычсыз Эресейни Къоруулау министерствосуну аскер-социал аралыгъына тюшедиле. Кесини къагъытына адам къысха заманны ичине джууаб алады. Керекли информацияны табхан бла бирге аскер къаугъагъа къошулгъанына шагъатлыкъ этген документге да ие болады.
Аскер-социал аралыкъ бу адрес бла орналгъанды: Черкесск шахар, Гагарин атлы орам, 24, телефон (8-8782) 28-41-24.