Къарачай-Черкесияны делегациясы къралыбызны Транспорт ведомствосуну 215-джыллыгъына аталгъан «Транспортная неделя» деген Бютеуэресей форумгъа къошулгъанды.
КъЧР-ни Башчысы Темрезланы Рашидни башчылыгъы бла делегацияны къурамына КъЧР-ни Правительствосуну Председатели Мурат Аргунов, КъЧР-ни транспорт бла джол мюлкню хакъындан министри Семенланы Ренат, «Управление федеральных автомобильных дорог «Кавказ» Федерального дорожного агентства» ФКУ-ну КъЧР-де бёлюмюню директору Къоркъмазланы Артур болгъандыла.
Форумда сёлешиннгенни юсюнден Къарачай-Черкесияны Башчысы Темрезланы Рашид: «Форумгъа къошулгъанла Къарачай-Черкесияда халкъла арасы аэропорт ишлеуге аталгъан кёрмючюбюзге бек сейир этиб къарадыла. Ол туристлеге джолну дженгил къоратыргъа джарарыгъын ушатдыла.
«Аэропорты Регионов» УК бла Кавказ инвестицион форумда этген кесаматыбызгъа кёре, хар неси да таб джарашдырылгъан аэродром къураллыкъды. Аны къурулушу 2028-чи джылны ахырына тамамланыргъа керекди.
Къралыбызны ёсюмю транспорт инфраструктураны джарашдырыу эмда джолланы игилендириу бла байламлыды. Аны юсюнден Эресейни Президенти Владимир Путин айтханлай, ол ишле баш борчларыбызны тизимине киргенлерин чертгенлей турады.
«Транспортная неделя» форумну тамалында транспорт инфраструктураны къалай джангыртылгъаны, джангы объектле къралыбызны къалай айнытханлары кёргюзюледи», -дегенди.
«Транспортная неделя» деген XVIII-чи форумну кёзюуюнде Федерал джол мюлкню тамадасы Виталий Новиков Къарачай-Черкесияны джол эмда транспорт инфраструктурасын айнытыугъа аталгъан кенгеш бардыргъанды. Ол кенгешге Къарачай-Черкесияны Башчысы Темрезланы Рашид, КъЧР-ни Правительствосуну Председатели Мурат Аргунов, КъЧР-ни транспорт бла джол мюлкню хакъындан министри Семенланы Ренат къошулгъандыла.
Анда «Къоркъуусуз эмда деменгили джолла» деген миллет проект бизни регионда къалай толтурулгъаны сюзюлгенди, аны кибик, джол инфраструктураны айнытыуну юсюнден да сёлешиннгенди.
Темрезланы Рашид бизни регионубузну инвесторланы кёллендирир хыйсабы уллу болгъанын, трнспорт эмда джол инфраструктура айныб, келген, кетген тынчыракъ болса, туристле мында солургъа бусагъатдан да бек кёлленниклерин чертгенди.
Кенгешде бизни регионну ол санагъатын айнытыргъа джараулу бусагъатда толтурула тургъан проектлени юслеринден да сёлешиннгенди.
Башчы туризм эмда промышленность ёсюм алыб баргъаны бла байламлы джолоучулукъну табыракъ къураргъа бек керек болгъанын чертгенди.
Анда талай ишни республиканы башчылыгъы бла Федерал джол мюлк бирге этерге да келишгендиле.
Кенгешни ахырында Темрезланы Рашид Роман Старовойтха, бизни регионну машина джолларына къаратыргъа уллу эс бёлгени, болушлукъ этиб тургъаны ючюн разылыгъын айтханды.
Форумну экинчи кюнюнде Эресейни Правительствосуну Председатели Михаил Мишустин пленар кенгеш бардыргъанды.
Республиканы Башчысы Темрезланы Рашид ол кенгешге да къошулгъанды.
Михаил Мишустин джол эмда транспорт комплекс джюзле бла предприятиелени ишлерин тюрлендирирге боллугъун чертиб сёлешгенди.
Эресейни Правительствосуну Председатели айтхандан, ол санагъатда уруннганла, къралны къоркъуусузлугъун бегитиуден башлаб, экономиканы ёсюмюне, уллу проектлени толтуруугъа, аны кибик башха ишлеге да джол ачадыла.
Аны ючюн, РФ-ны Президенти транспорт инфраструктураны игилендириуге айырыб эс бёледи.
Владимир Путинни излеми бла ол санагъатны айнытыр джанындан къралда кёб иш этиледи.
Аланы юслеринден да форумда РФ-ны Вице-премьери Марат Хуснуллин бла Эресейни транспортну хакъындан министри Роман Старовойт айтхандыла.
Темрезланы Рашид бу форум быйыл къралыбызны ол санагъатында этиллик ишлени белгиленнгеннге санагъанын айтханды.
«Бу форум кърал къуллукъчула бла бизнесменлени араларында транспорт бла байламлы джарсыуланы ачыкълаб, аланы тюзетир мадарла излер мурат бла къуралгъан эди да, ол баш нюзюрюне джетгенди.
Бюгюнлюкде Къарачай-Черкесияны джол эмда транспорт инфраструктурасы къралны логистика системасыны айырылмазлыкъ кесегиди. Аны ючюн, биз да кърал бла бирге ёсюм ала барыргъа керекбиз.
Аэропорт ишлеу, федерал джолланы джангыртыу дегенча ишлеге аталгъан проектлерибиз регионубузгъа да, къралгъа да ёсюм алдырлыкъдыла», - дегенди Темрезланы Рашид.
