Мындан алда Эресейни билим бериуню хакъындан министри Сергей Кравцов бла Къарачай-Черкесияны Башчысы Темрезланы Рашид бизни республиканы муниципал районларыны окъуу учреждениелерини келечилерине 22 джангы школ автобусну ачхычларын къууанч халда бердиле.

Ол къууанч джыйылыугъа кёб адам келген эди. Джыйылгъанланы алларына чыгъыб Сергей Кравцов сёлешди.

«Мен сизни бу джарыкъ къууанчыгъыз бла алгъышлайма. Мындан ары да быллай къууанчларыгъыз кёб болсунла! Джангы окъуу учреждениеле ишленедиле, школла тамамлы ремонтну программасына киредиле. Къралыбызны Президенти Владимир Путинни аманаты бла, эндиги джылдан башлаб, сабий садлагъа да ремонт этилиб башланныкъды», - деди Сергей Кравцов.

Андан сора Къарачай-Черкес Республиканы Башчысы Темрезланы Рашид сёлешди. 

«Эресей Федерацияны Президенти Владимир Путин барыбызны да аллыбызда, эресейчи школну дунияда эм игилени бири этерге кереклисини юсюнден стратегия борч салгъанды. Миллет проектле бла федерал программаланы джашаугъа киргизиу, «Школьный автобус» деген программа да ары къошулуб, ол борчну толтурур мадарла къурайдыла.

Арт 6 джылны ичинде республиканы школ машина паркы, 200-ге кёб болуб, джангыргъанды. Джангы улоуну кючюнден регионну сохталары окъуу, маданият, патриот, спорт эмда башха джыйылыулагъа тынчлыкълы барырча мадар табарыкъдыла.

Республиканы Правительствосуну баш борчларыны бири сабийлени школлагъа тынч, рахат, таб болумда джюрютюб турурча мадар къурауду. Бюгюнлюкде Эресей Федерацияны Президенти Владимир Путинни, Эресейни Правительствосуну, Окъуу министерствосуну, «Бирикген Эресей» партияны джакълыгъы бла ол борчну толтура, алгъа тири атламла эте барабыз, бу джол да алай болду. Республиканы школларыны сабийлери джангы автобуслагъа къууандыла.

Лепшокъланы Хусеин.