Абыстол (ноябрь) айны 7-де Нальчикде А. Шогенцуков атлы кърал концерт залда Къабарты-Малкъар Республиканы «Заман», «Кабардино-Балкарская правда», «Адыгэ псалъэ» газетлери 100-джыллыкъ юбилейлерин джарыкъ белгиледиле.
Бир ёмюрню узагъына къарнаш республикада джашагъан халкъланы джетишимлерине, джарсыуларына эс бёлдюрюб, адамлагъа керекли информацияны джетдириб тургъан кърал газетлени байрамларына бек кёб адам джыйылгъан эди, Къабарты-Малкъарны Башчысы Казбек Коков кеси да келген эди.
«100 джылны ашхы адамларыбызны, этилген ишлерибизни, джарсыуларыбызны юслеринден джазыб, келир тёлюлеге басманы джолунда сокъмакъ салгъаныгъыз ючюн уллу бюсюреу этеме», - деб, Къабарты-Малкъарны Башчысы юч редакцияда ишлегенлеге да уллу сый, махтау бериб сёлешди.
Ызы бла Казбек Коков «Заман», «Кабардино-Балкарская правда», «Адыгэ псалъэ» газетлени редакцияларында бюсюреулю ишлегенлени атларын табды.
Алайда «Заман» газетни баш редакторуну орунбасары Жангуразланы Нажаба, «Кабардино-Балкарская правда» газетни редактору Мая Кожакова, «Адыгэ псалъэ» газетни джууаблы секретары Элла Каншокова Къабарты-Малкъар Республиканы Хурмет къагъытлары бла саугъаландыла.
«Заслуженный журналист Кабардино-Балкарской Республики» деген сыйлы ат да «Кабардино-Балкарская правда» газетни шеф-редактору Гуртуланы Расулгъа, «Заман» газетни бёлюмюню редактору Трамланы Зухрагъа, «Адыгэ псалъэ» газетни бёлюмюню редактору Замира Нашапиговогъа аталды.
Республиканы Башчысыны Разылыкъ къагъытларын да «Заман» газетни бёлюмюню редактору Османланы Хыйса, «Адыгэ псалъэ» газетни бёлюмюню тамадасы Иза Шхашамишева, «Кабардино-Балкарская правда» газетни корреспонденти Марина Биденко алдыла.
Къабарты-Малкъарны Башчысы Казбек Коков саугъалаб бошагъандан сора, къарнаш республиканы Правительствосуну, Парламентини келечилери юч редакцияны да къуллукъчуларына алгъышларын айтыб, бир къауум журналистлениХурмет къагъытла бла саугъаладыла.
Къууанч джыйылыуда бизге - хоншу регионладан баргъан делегатлагъа - да берилди сёз. Къарачай-Черкесияны делегациясыны къурамында РФ-ны Журналистлерини союзуну бизни республикада бёлюмюню тамадасы Увжук Тхагапсов, «Черкес хэку» газетни баш редактору Люсана Абидокова, «Къарачай» газетден мен баргъан эдик. Биз да, Къарачай-Черкесияны миллет ишлерини, кёбчюлюк коммуникациялары бла басмасыны хакъындан министри Мурат Есенеев салгъан борчну толтура, юбилярлагъа алгъыш этиб, бирерибиз бирер редакцияны келечилерин саугъаладыкъ.
Меннге кёзюу джетгенинде «Заман» газетни редакциясын да, анда кёб джылны узагъына махтаулу ишлеген Таппасханланы Аминатны, Ульбашланы Муратны, Темуккуланы Асиятны Къарачай-Черкесияны Миллет ишлерини, кёбчюлюк коммуникациялары бла басмасыны хакъындан министерствосуну Хурмет грамоталары бла сюйюб саугъаладым.
«Къарачай» газетни баш редактору Къоркъмазланы Салиманы алгъышлау саламы бла бирге редакцияны атындан хазырлагъан ачха саугъабызны да бердим.
Сахнадан журналистиканы ветеранлары, башха сыйлы къонакъла да сёлешдиле. Ала бары да «Заман», «Кабардино-Балкарская правда», «Адыгэ псалъэ» газетлени редакцияларында ишлегенлеге узакъ ёмюр, чыгъармачылыкъ ишлеринде уллу джетишимле теджедиле, саугъала этдиле.
Къууанч джыйылыуну ахырында «Кабардино-Балкарская правда» газетни баш редактору Ранета Бжахова, «Адыгэ псалъэ» газетни баш редактору Заурбек Жилясов, «Заман» газетни баш редактору Къонакъланы Хасан къонакълагъа разылыкъларын билдирдиле.
Къонакъла, къонакъбайла да бир-бирибизге разы болуб, алгъыш эте чачылдыкъ.
БАЙРАМКЪУЛЛАНЫ Зульфия.
