Быйыл джай кёзюуде, къыркъар (август) айны 15-ден 18-не дери, Ставрополь крайда регионла арасында «Ата джуртну къоруулаучуланы кубогу» деген ат бла спортну талай тюрлюсюнден эришиуле ётген эдиле.

Анга бизни республикадан СВО-ну ветеранлары (бютеулей да джети джаш) къошулгъан эдиле. Ала, спецоперацияда Ата джуртну салгъан борчун тыйыншлы толтура, къыйын сынауладан махтау бла ётгендиле, ётгюрлюкню юлгюсюн кёргюзюб, сыйлы аскер саугъалагъа да ие болгъандыла – Ётгюрлюкню орденине, Жуковну эмда Суворовну медалларына. Алай болса да, бу джол спорт джаны бла кеслерини кючлерин, усталыкъларын сынаб кёрдюле. Эришиулени эсеблерин чыгъаргъанларындан сора, анда хорлагъан джердешлерибизге республиканы башчылары тыйыншлысыча сый бериб, джарыкъ тюбегендиле. Тюбешиуге КъЧР-ни Правительствосуну Председателини орунбасары Джанибек Суюнов, урунууну эмда социал ёсюмню министри Хачирланы Кемал, «Защитники Отечества» фондну бизни регионда филиалыны башчысы Абазалыланы Марат, бирси джамагъат къуллукъчула дагъыда башхала келген эдиле.

Эришиуледе махтаулу ветеранла волейбол команданы къурамында 2-чи орунну алгъандыла. Стол теннисде Наурузланы Мекер, уста ойнаб, алтын медалгъа ие болгъанды. Алай бла, энди Къарачай-Черкесияны спорт командасына Эресей дараджада бардырыллыкъ эришиулеге къошулургъа мадар берилгенди.

- Алгъы бурун джашларыбызгъа, СВО-да бек магъаналы джумушну тыйыншлы толтургъанлары ючюн, Ата джуртларына кертиликлери ючюн, джюрек разылыгъымы билдирирге излейме. Ала кеслерини джетишимлерин спортда да толу танытдыла энтда бир кере. Сизни къыйыныгъызгъа, хорламыгъызгъа бек къууанабыз, сизни тирилигигиз бла ёхтемленебиз. Мындан ары да, сизге спортда уллу джетишимле, хорламла теджейме, - деди Джанибек Суюнов.

Алгъышлау сёзюн тамамлагъандан сора, КъЧР- ни вице-премьери хор- ламлы болуб келген джашланы - Джуккаланы Муссалимни, Харатоков Нурийни, Андрей Руденкону, Наурузланы Мекерни, Хатков Исламны, Максим Жилинни - Республиканы Башчысы Темрезланы Рашидни атындан Бюсюреу къагъытла бла саугъалады, бирси багъалы саугъала да берди. Ветеран джашла да бу хорлам кеслеринден да бек СВО-да къыйын хыйсаблада уруш этген, сакъатлыкъ табхан джашлагъа джашауда тирилирге уллу магъанасы болгъанын чертиб айтдыла.

Регионла арасында бардырылгъан эришиуледе хорлагъанла абыстол (ноябрь) айны 17-де Сочи шахарда бардырыллыкъ эришиулеге къошуллукъдула.

 
{jcomments}