Бу кюнледе Арабияны Шардже шахарында джыл сайын къуралыучу халкъла арасы китаб джармалыкъ ётгенди.

Бирлешген Араб Эмиратланы Баш советини къурамындан Шарджени патчахы болуб тургъан Султан бен Мухаммед Аль-Касими шейхни башчылыгъы бла аллай китаб джармалыкъ биринчи кере 1982-чи джыл къуралгъанды.

Андан бери аны тамалында хар джыл сайын Шарджеде бютеу дунияны алчы издательстволары чыгъаргъан китабла кёргюзюледиле. Бу джол да алай этилгенди. Быйылгъы китаб джармалыкъгъа Эресейни фахмулу джазыучулары, экспертлери да къошулгъандыла.

Эресейчи делегацияны эмда анда кёргюзюллюк китабланы тизимин Бирлешген китаб издательство (ОГИ) къурагъанды. Анга бу ишни таб къураргъа Эресейни Цифра министерствосу кёлтюргючлюк этгенди.

Китаб джармалыкъны тамалында Эресейде джашагъан халкъланы  адабиятларын ёсдюрюуге аталгъан лекцияла, ачыкъ ушакъла, презентацияла, аны кибик башха ишле бардырылгъандыла.

Китаб джармалыкъгъа къошулгъан эресейчи делегацияны къурамында «Къарачай» газетни директору-баш редактору Къоркъмазланы Хасанны къызы Салима да болгъанды. Ол анда Уллу Ата джурт къазауатны 80-джыллыгъына аталгъан «Фронтовики-литераторы Карачая» деген лекциясын окъугъанды. Салима Хасановна ана тилибизде чыкъгъан «Къарачай» газетге быйыл 100 джыл болгъаны бла байламлы аны тарихинден да толу хапар айтханды.

Газетни информацион къуллугъу.