Бу кюнледе Шимал Кавказ кърал академияны Медицина институтуну волонтёрлары-медиклери практикаларын ётерге деб, 30-чу кере Дондагъы Ростов шахарда орналгъан аскер госпиталгъа кетгендиле.

Студентлени академияны Аскер окъуу аралыгъындан къууанч халда ашыргъандыла. Ала аскерчилеге гуманитар болушлукъ да хазырлагъандыла.
30-чу къауумну къурамына медицина институтну абадан курсларында окъугъан 10 студент киргенди. Аланы кёбюсю ары дери да аскер госпиталгъа талай кере баргъанды.
«Студентлени хар бири госпиталгъа кеси разылыкълары бла барады. Алагъа ата-аналары, джууукълары да кёл бередиле. Госпиталда студентле аскер врачлагъа аскер къаугъада джаралы болгъан джашланы багъаргъа болушадыла. Ала биринчи болушлукъ табдырадыла, джараланы байлайдыла, диагностика этедиле, операциялагъа да къошуладыла. Медицина учреждениени башчылыгъыны тилеги бла студентледен шышалагъа къуюлгъан сегиз тонна суу джибергенбиз», – дегенди Шимал Кавказ кърал академияны ректору Къочхарланы Руслан.
Айтыргъа, 2022-чи джыл никкол (июнь) айдан бери студентледен 10-12 адам къуралыб, Дондагъы Ростовда аскер госпиталгъа эки ыйыкъгъа барыб келедиле. Академия аскер къаугъагъа къошулгъанлагъа, джангы регионлада джашагъанлагъа да гуманитар болушлукъ ашыргъанлай турады.

САЛПАГЪАРЛАНЫ Умар.