Багъалы джердешле!
Бюгюн къарачай халкъны тарихинде эм уллу бушуу кюннге – аны Орта Азия бла Къазахстаннга кёчюрюлгенине – 81 джыл толады. Бу кюн туугъан джуртларындан зор бла кёчюрюлюб, кёб къыйынлыкъ сынагъанланы эсибизге тюшюребиз.

Кёчгюнчюлюк къарачай миллетни тарихини эм мутхуз бетлерини бири болгъанды. Эркишиле Уллу Ата джурт къазауатны фронтларында уруш бардыргъан кёзюуде къартларыбыз, сабийле, тиширыула кёб зарауатлыкъ кёргендиле.
Джолда да, кёчгюнчюлюкню джылларында да кёб адам ёлгенди. Аланы хар бирини аты миллетни эсинде турады. Къыйын болгъанына да къарамай, къарачайлыла джанларын-къанларын аямай кюрешиб, сау къалгъандыла, ашхы адетлерин, маданиятларын, ана тиллерин сакълагъандыла. Алай бла, 67 джылны мындан алда, туугъан джуртларына къайтыб келгендиле.
Арадан джылла оза, къралыбыз ёсюм алыб баргъанын, аны кёб миллетли халкъы, бир юйюрча, шохлукъда джашагъанын кёребиз. Джердешлерибизни туугъан джуртларына сюймекликлери уа не заманда да сакъланады. Къарачай-Черкесияны кёб миллетли, бирикген халкъы бир-бири сыйын кёрюб джашайды. Джылдан джылгъа биз алгъа тири атламла этебиз, сюйген республикабызгъа ёсюм алдырыб кюрешебиз. Не заманда да биз бирге болуб, сабийлерибизге тыйыншлы джашау къураргъа, энди келлик тёлюлеге маданият байлыгъыбызны сакъларгъа керекбиз.
Мындан ары кёчгюнчюлюкча ачы къыйынлыкъны бир миллет да сынамасын. Сюргюнню джылларында ауушхан ахлуларыбызны эсгеребиз. Хар юйдегиге кючлю саулукъ, ашхылыкъла теджейбиз. Эсибизде къуру да бюгюннгю джетишимлерибиз, ашхы ишлерибиз сакълансынла.

Къарачай-Черкес Республиканы Башчысы
Темрезланы Рашид

Къарачай-Черкес Республиканы Халкъ
Джыйылыууну (Парламентини) Председатели
Иванов Александр
Къарачай-Черкес Республиканы
Правительствосуну Председатели
АРГУНОВ Мурат.