Мындан алда «Къарачай» ат заводда къарачай тукъумлу джаш атланы кёрмючю (выставка-выводка) болду. Анда кёб тюрлю ариу, агъачлы аджирни кёргюздюле. «Джатдай» деген къарачай тукъумлу 4-джыллыкъ аджир эм онглугъа саналды.
Белгилисича, эртдеден да къарачай тукъумлу агъачлы атланы ёсдюрюу ат заводну мийик джетишимлерини бириди. Бу тукъумлу атла таулада, тикледе, баш энгишгеде къыйын, тар джолчукълада да къыйналмай барадыла. Ала эл мюлк ишледен сора да, ат спортда, арт джыллада кенг джайылгъан ат туризмде белгилидиле. Аланы, Эресейдеча, тыш къраллада да бек кёб хайырландырадыла. Къарачай тукъумлу агъачлы атла 600 бардыла, аланы эм игилери тау джуртларында Къарачай-Черкесиядадыла.
Бу тукъумда селекция ишле бардыра, аны ишни къалай толтургъанына, тёзюмлюлюгюне, ариулугъуна, санына, башха затына къарайдыла. Аджирлеге тёзюмлюлюклерине, къаллай бир джолну арымай баргъанларына, чабханларына кёре багъа бередиле.
Бу джол бардырылгъан джаш атланы кёрмючюнде бу тукъумдан 60 аджир бар эди. Ала эки тюрлю къауумгъа, юч, тёрт джыл болгъанлагъа юлешиниб, эдиле. Алагъа багъа берген сюдю коллегия Къарачай-Черкесиядан, Ставрополь крайдан, «Къарачай Хорс» деген къарачай тукъумлу атланы ёсюмюне джакълыкъ этген ассоциациядан, атланы усталарындан къуралгъан эди. К.А. Тимирязев атлы академияны атла бла байламлы кафедрасыны тамадасы профессор Владимир Александрович Дёмин бойсунмагъан эксперт халда ишлей эди.
Багъа эки тюрлю затны юсюнде берилди. Атны джюрюгенине, кесин тутханына къарай эдиле. Экинчи, эм кёб балл алгъан 8 иги аджир тенглешдириу рингге сайланнган эдиле.
2021-чи джыл туугъан атланы къауумунда 37 ат бар эди. «Аскет» бла «Саблийден» туугъан «Аланат» деген ат эм игиге саналды. Ол «Къарачай» ат заводда Чомаланы Муратны мюлкюнде туугъанды.
Вице-чемпион титулну Эльзар Бахиевни «Закан» деген тору аджири алды. Ючюнчю оруннга Къобанланы Ахматны «Аль-Хаттал» деген аты чыкъды.
Тёрт джыл болгъан 22 атны арасында Боташланы Асланны Тамбийланы Муратда туугъан «Джатдай» деген къаратору аты алды. Ол 3 джыл болгъан сагъатында кесини къауумунда 4-чю оруннга чыкъгъанды. Бу джол кёрмючде уа аныча джокъ эди. Вице-чемпион титулну Хубийланы Азаматны «Даул» деген тору аджири алды. Хубийланы Халитни «Очерк» деген аты ючюнчю оруннга чыкъды. Ёчлю орунланы алгъан атланы бары да ариу санлы, таб къымылдагъан, тынч халили эдиле.
Кёб тюрлю сейир атдан къуралгъан кёрмюч, ол ашхылыкъны джыйылгъанлагъа кёргюзюб, атланы сюйген кёб адамны джюрегине къууанч салды.
Узеирланы Хусей.
