Бу кюнледе КъЧР-ни илму аралыгъы, тамаша джуртубузну къабагъы, халкъыбызны атын джюрютген Къарачай шахар 97-чи кере туугъан кюнюн белгиледи.
Шахарны ара майданы танг атханлай да адамдан толгъан эди. Байрамгъа келген джамагъатны къонакъбайла тойгъа-оюннга, тюрлю-тюрлю эришиулеге къошулуб, кёз ачаргъа чакъыра эдиле. Аны бла да къалмай, шахарчыланы, къонакъланы да кёб тюрлю миллет хунерле бла да танышдыра эдиле. Шахарны администрациясы аниматорла бла уллу гинджилени да чакъырыб, сабийлени бек къууандырды. Мэрияны уллу залында уа шахарны айныууна хар кюн сайын кеслерини юлюшлерин къошханлагъа сый, махтау бердиле. Республиканы Правительствосуну, Парламентини, шахарны кесини махтау эмда хурмет къагъытлары бла санагъат къуллукъчуланы, устазланы, медиклени дагъыда башхаланы саугъаладыла. Къыйынлары эслениб, тыйыншлы саугъаларын табханланы арасында шахарны «Минги Тау» атлы муниципал газетни башчысы Багъатырланы Мурат да болду. Багъатыр улу джюрек разылыгъын билдирген бла бирге, саугъа, къуру аныкъы болуб къалмай, анга билек болуб, биргесине ишлегенлени да анда къыйынлары болгъанын чертди. КъЧР-ни Башчысы Темрезланы Бориспийни джашы Рашидни алгъыш сёзлерин шахарчылагъа, аланы байрамларына келиб тургъан къонакълагъа да республиканы биринчи вице-премьери Смаккуланы Дахир окъуду.
«Бир ишексиз, шахарны айнытхан, ариу этген да анда джашагъан джамагъатды. Сизни хар биригиз арымай-талмай, эрикмейин, эринмейин кюн сайын салгъан къыйыныгъызды барыбыз да бек сюйген шахарыбызны джашнатхан. Кючюгюз кёб болсун, багъалы джердешлерим!» - деб айтыла эди Башчыны алгъышлауунда.
«Къарачай шахарны тарихи бек терен болмаса да, тамам сейир энчиликлери аз тюлдюле. Къарачайны ара шахары аллындан да - биринчи ташы салыннганындан башлаб, шахар халда ишлениб тебрегенди. Шахарны тамалын салгъан а Къарачай автоном областны ол кёзюудеги башчысы Гюрджюланы Алийни джашы Къурман-Алийди. Айтылгъан-джюрюген хапаргъа кёре, аны къалайгъа тюшерини оноуун Гюрджю улу, къуру кеси этиб къоймай, къартла бла кенгешиб алай сайлагъанды. Иш тамам къайнаб 1926-чы джыл башланнганды, 1927-чи джылны абыстол (ноябрь) айыны 7-де Къарачай областны кесини энчи ара шахары байрам халда къабакъ эшиклерин кенгнге ачханды. Тюгел ёмюр толмагъан заманны ичине Къарачайны тюнгюч шахары юч тюрлю ат джюрютгенди. Ачылгъан кюнюнден 1943-чю джыл абыстол (ноябрь) айны 6-на дери Микоян-Шахар болгъанды. Иелери сюргюнде тургъан 14 джылны, ёксюз къалгъан джуртубузну кёб джерлери кибик, шахарыбыз да гюрджю тилден келген Клухори атны алгъанды. Бюгюннгю кесини миллетини керти атын а, 1957-чи джыл халкъыбыз Джуртуна къайтхандан бери джюрютеди. Перестройкадан сора, къралны къалгъан джерлериндеча, Къарачай шахар да бек къыйын болумгъа тюшген эди. Ишсизлик, ачхасызлыкъ былайлагъа да джетиб, шахарны кёб мюлкю оюлгъан-тоналгъан бла къалмай, джангыртылмаздан тюб болуб да къалды. Алай болса да, бюгюн шахарыбыз силкиниб, алгъа атлай тебрегенди. Хар джыл сайын дегенча, заманны излемине кёре ишленнген джангы спорт, маданият эмда социал объектле ачыладыла», – деб, къууаннганын билдире, сёлешди шахарны мэри Орусланы Марат да.
Токъсан джети джыл адам улугъа, хазна къалмай, толгъан ёмюр кибик кёрюнсе да, шахаргъа ол аз заманды. «Сабийликден» джангы чыгъыб, «акъыл-балыкъ» болуб тебреген шахарыбыз, Аллах айтса, халкъыбызны атын джюрютген бла къалмай, аны бютеу дуния башына ашхы джетишимлери бла баям этер.
Халкёчланы Ахмат.
