Къарачай шахар кесини 97-джыллыгъын къууанч халда белгилегенди. Андан алгъаракъ джаш тёлюге джораланыб квест бардырылгъанды.

Джаш адамла туугъан, джашагъан шахарларыны тарихи бла байламлы соруулагъа джууаб бергендиле. Ол оюннга 15 адам къошулгъанды, аланы эм тамадасына 17, эм кичисине да 13 джыл болгъанды.
Квестни юсю бла джаш адамла шахарны белгили джерлерине экскурсиягъа айланнгандыла. Сёз ючюн, ала шахарны тамалын салгъан Гюрджюланы Къурманны эсгертмесинде, КъЧР-ни халкъ поэти Сюйюнчланы Азаматны музейинде дагъыда талай джерде болгъандыла.
– Бизни баш муратыбыз джаш тёлюню тарих бла байламлы билимин сынау эди. Айхай да, ала кёб затны билгенлерин да билдирдиле, кеслери да кёб затдан хапарлы болдула. Быллай квестлени мындан ары да бардырыргъа оноулашдыкъ, – деб хапар айтханды Къарачай шахарны мэриясыны туризм бла джаш тёлю политикадан бёлюмюню тамадасы Салпагъарланы Елена.
Квестге къошулгъанлагъа сертификатла бла саугъала берилгендиле.
Шахарны туугъан кюнюню 97-джыллыгъына багъышлаб, ашхы концерт программа хазырланнганын да чертерге тыйыншлыды. «Къачны берекети» деген кёрмюч да ол затха толу шагъатлыкъды. Джырдан, тепсеуден сора да байрамгъа келгенлеге тюрлю-тюрлю конкурсла эмда спорт эришиуле теджелгендиле.