Татарстанны ара шахары Къазанда XVI-чы БРИКС саммит кесини ишин тамамлагъанды. Эресейни Президенти Владимир Путин аны къралны Правительствосуну эм уллу джетишимине санагъанды.

Саммитни биринчи кюнюнде Владимир Путин Къазанны кремль къаласында бирлешликни къурамына кирген къралланы башчылары бла тюбешгенди. Экинчи кюн ол БРИКС саммитни кенгешлеринде председателлик этгенди – 43 бетни толтургъан декларация бла тамамланнганды ол кюн.
Саммитни ючюнчю кюнюнде «аут рич»/ «БРИКС плюс» деген формат бла тюбешиуле бардырылгъандыла. Ол тюбешиулеге Азербайджанны, Арменияны, Белоруссияны, Боливияны, Венесуэланы, Вьетнамны, Къазахстанны, Къыргъызияны, Лаосну, Мавританияны, Палестинаны, Конго Республиканы, Таджикистанны, Турцияны, Туркменияны эмда Узбекистанны башчылары эмда ООН-ну баш секретары Антониу Гутерриш къошулгъандыла. Ала бирлешлик бла иш джюрютюрге разылыкъларын билдиргендиле. Саммит ишин бошагъандан сора, Путинни пресс-конференциясы болгъанды.
Бютеулей да саммитни ишине дунияны 35 къралы бла алты халкъла арасы организация къошулгъандыла.
Саммит башланырдан алгъа эки къралны тамадасы – Бразилияны Президенти Луис Инасиу Лула да Силва бла Сербияны Президенти Александр Вучич – келир мадарлары болмагъанларын билдиргендиле. Сербияны делегациясына премьер-министр Александр Вулин башчылыкъ этгенди.
Индияны премьер-министри Нарендра Моди Къазанда эки кюн туруб, къонакъла сакълагъаны амалтын ызына кетгенди. Къытайны башчысы Си Цзиньпин бла Турцияны Президенти Реджеп Тайип Эрдоган, бирер чурум чыгъыб, саммитни аягъына дери турмай кетгендиле.