Аууз-герги (октябрь) айны 25-де «Къарачай» бла «Черкес хэку» газетлени 100-джыллыкъ юбилейлерине аталыб, республиканы ара шахарында уллу къууанч джыйылыу болду.
Джыйылыугъа КъЧР-ни Правительствосуну Председатели Мурат Аргунов, Къарачай-Черкесияны Башчысыны эмда Правительствосуну Администрациясыны тамадасыны орунбасары Хубийланы Марат, КъЧР-ни Правительствосуну Председателини орунбасары Сюйюнчланы Мурат, Къарачай-Черкесияны миллет ишлерини, кёбчюлюк коммуникациялары бла басмасыны хакъындан министри Мурат Есенеев дагъыда башха кърал къуллукъчула бла республиканы Халкъ Джыйылыууну депутатлары къошулгъан эдиле.
Байрамгъа Адыгеядан, Къабарты-Малкъардан, Абхазиядан къонакъла да келген эдиле.
Джыйылгъанла бары да миллет тилледе кърал газетлени чыгъаргъанлагъа сый, махтау бердиле. Алайда 100 джылны ичинде эки редакция да джууаблы къуллукъларын махтаулу баджарыб келгенлерин суратлагъан роликле да кёргюзюлдюле.
Къарачай-Черкесияны Башчысыны атындан «Къарачай" бла «Черкес хэку» газетлени редакцияларыны хурметли ветеранлары бла ишчилерин республиканы Правительствосуну Председатели Мурат Аргунов алгъышлады.
«Бир ёмюрню ичинде, къралны, республиканы да алай тынчлыкълы болмагъан кёзюулеринде, газетле регионубузда джашагъан адамлагъа керекли информацияны толу джетдириб, тынгылы этиб тургъандыла. Статьяланы, репортажланы окъуб, адамла магъаналы ишлени юслеринден хапарлы болгъандыла. Газетде джазылгъаннга адамла бек ийнаннгандыла. Бурундан да редакциялада белгили поэтле, джазыучула, фахмулу, билимли адамла ишлеб тургъандыла. Бусагъатда да алайды», - деди КъЧР-ни Правительствосуну Председатели.
Хар санагъат байрамда болуучусуча, бу джол да алгъышлаула бла бирге саугъалаула да болдула.
Къарачай-Черкесияны Башчысыны Указы бла, «Къарачай» бла «Черкес хэку» газетлени редакцияларында бир талай джылны бюсюреулю ишлеб, регионну журналистика ёсюмюне уллу юлюш къошханлары ючюн, Байрамкъулланы Зульфиягъа, Марина Дзамыховагъа, Хубийланы Фатимагъа, Ира Туаршевагъа «Къарачай-Черкесияны махтаулу журналисти», Эбзеланы Марьяна бла Асят Тлимаховагъа да «Къарачай-Черкесияны махтаулу экономисти» деген атла аталдыла.
Алайда «Къарачай» газетни директору-баш редактору Къоркъмазланы Салима бла аны орунбасары Хайыркъызланы Зарема да КъЧР-ни Башчысыны Хурмет грамотасы эмда Разылыкъ къагъыты бла саугъаландыла.
Лепшокъланы Хусеин бла Хубийланы Людмила да Правительствону Хурмет грамоталарын алдыла.
Премьер-министр, Къарачай-Черкесияны Башчысы Темрезланы Рашид 5 кърал газетни да редакцияларына Веста машинала берирге оноу этгенин айтыб, газетлени баш редакторларына джангы транспортну документлери бла ачхычларын бериб къууандырды.
Джыйылыуда республиканы Халкъ Джыйылыууну Председателини атындан юбилярлагъа алгъыш Миллет политиканы, тыш байламлылыкъны, НКО-ла бла СМИ-лени ишлерини хакъындан комитетни тамадасы Темрезланы Науруз этди.
«100 джыл сау ёмюрдю. Бюгюн барыбыз да бирге «Къарачай» бла «Черкес хэку» газетлени 100-джыллыкъ юбилейлерин къууанч бла белгилегенибизге къууанама. Миллет газетлени редакциялары Къарачай-Черкесияны фахмулу журналистлерине сынам берген школла болуб тургъанларын чертерге излейме.
Эки коллективге да биригиб, бусагъатха дери сакъланнган байламлылыкъны ёсдюре, иги чурумла бла байламлы адамла сюйюб окъурча, таурухлу Къарачай-Черкесия бла деу Эресейни сыйын чыгъарырча, миллетле арасы келишиулюкню бегитирча материалла басмаларгъа теджейме. Джетишимли болугъуз!» - деди депутат.
Науруз Срапилевич да Мамчуланы Динаны, Ёзденланы Якъубну, Байчораланы Алинаны, Семенланы Лидияны Халкъ Джыйылыуну Президиумуну Хурмет грамоталары бла, Салпагъарланы Умар бла Алийланы Залинаны да Халкъ Джыйылыуну Председателини Разылыкъ къагъытлары бла саугъалады.
Адыгеядан, Къабарты-Малкъардан, Абхазиядан келген къонакъла да эки редакцияны къуллукъчуларына алгъышларын айтыб, саугъала бердиле. Къарнаш республикадан келген къонакъла да Къабарты-Малкъарны Маданият министерствосуну Хурмет грамоталары бла Джазаланы Лидияны, Батчаланы Фатиманы дагъыда башхаланы атларын табдыла.
Джыйылыуда «Черкес хэку" газетни редакциясыны ветераны Дауров Джагъафар бла «Къарачай» газетни редакциясында 40 джылдан асламны ишлеген, бюгюнлюкде да джаш журналистлеге джол кёргюзюб тургъан Мамчуланы Дина миллет газетлени редакциялары бурундан бери да шох, келишиулю ишлеб келгенлерин чертиб сёлешдиле.
Иш нёгерлерин «День республики», «Абазашта», «Ногъай давысы» газетлени баш редакторлары Евгений Кратов, Фардаус Кулова, Алтынай Атуова да алгъышладыла.
Къууанч джыйылыуну ахырында «Къарачай» газетни директору-баш редактору Къоркъмазланы Салима бла «Черкес хэку» газетни баш редактору-директору Люсана Абидокова къонакълагъа разылыкъларын билдирдиле.
Къоркъмазланы Салима «Джетегейле» (Большая Медведица) деген джулдуз бёлекде бир джулдузгъа, «Къарачай» деб, ана тилибизде чыкъгъан джангыз кърал газетни атын ататханын айтханында уа бютеу къарачайлыла да ёхтемлендиле. «Къарачай» атлы джулдуз 100-джыллыкъ юбилейибизге уллу саугъа болду.
Къууанч джыйылыуда «Эльбрус», «Джёгетей» ансамблле бла Гожева Аминат, Катчиланы Руслан, Меремкулов Ачар дагъыда башха артистлерибиз да, джырлаб, тепсеб, джыйылгъанлагъа кёз ачдырдыла. Алай бла байрам джарыкъ эмда къурамлы ётдю.
БАЙРАМКЪУЛЛАНЫ Зульфия.
