Адыгея кърал университетни физкультура бла дзюдону хакъындан институтунда, Александр Дёминни сыйына аталыб, панкратиондан эришиуле бардырылгъандыла.

Эришиулеге Краснодар, Ставрополь крайладан, Адыгеядан, Ингушетиядан, Чеченден, Къарачай-Черкесиядан, Калмыкиядан, Терк Башы Тегейден, Воронеж эмда Ростов областладан 250-ден аслам спортчу къошулгъанды. Аллай эришиуле ФСБ-ны «Альфа» деген спецназ аралыгъыны къуллукъчусу, 1997-чи джыл Майкопда террористлеге къаршчы операцияны кёзюуюнде ёлген Александр Дёминни эсгериуге аталыб джыл сайын бардырыладыла.
Уруп райондан «Urup Fighters» деген клубну спортчулары да ол эришиулеге къошулуб, алчы орунланы алыб къайтхандыла.
Алайды да, эришиулени эсеблерине кёре, Сарыланы Мухаммад, Хабланы Ислам, Шаманланы Тимур тюрлю-тюрлю ауурлукълада биринчи орунланы алгъандыла. Аджиланы Расул, Алботланы Ислам, Михаил Войценховский, Сарыланы Амин, Чомаланы Алихан ючюнчю орунлагъа тыйыншлы болгъандыла.
Спортчуланы эришиулеге Батчаланы Арсен хазырлагъанды.