Халкъыбызны онглу адамларыны бири Джазаланы Юсюпню джашы Балуаны халал джюрегини къыллары джырлай, ол ата-бабадан келген ашхы адетлени сыйлай джашай эди. Аны терен акъылы адамлагъа къууанч келтире, миллетлени арасында къарнаш шохлукъну кючюн бегите, таукел алгъа бара эди.
Балуа орта билим берген школну, ызы бла техникумну бошагъандан сора «Къобан» колхозда комсомол организацияны секретары болуб тургъанды. Артда джерни хазналарын тинтген компанияда бурилщик болуб, къаджыкъмай, талмай ишлеб кюрешгенди. Черкесскеде бузлатыучу машинала чыгъаргъан заводда слесарь болуб да тургъанды. Таулу джаш 1962-чи – 1967-чи джыллада Къарачай-Черкес кърал устаз институтну филология факультетинде окъугъанды.
Балуа джашаууну 50 джылын бир ишге – журналистликге – бергенди. Ол аны бла биргелей чыгъармачылыкъ фахмусуну кючюн къатлай, таукел алгъа баргъанды. Журналистиканы, адабиятны, маданиятны ёсюмюне тыйыншлы юлюш къошханды. Ол Эресей Федерацияны Джазыучулары бла Журналистлерини союзларыны члени эди, «Къарачай-Черкес Республиканы махтаулу журналисти», «Къарачай-Черкес Республиканы маданиятыны махтаулу къуллукъчусу» деген сыйлы атланы джюрюте эди. Окъугъан, ишлеген сагъатында да, аламат устазлары болгъандыла.
Аны документли повестлери, очерклери, зарисовкалары, радио ушакълары, суратлаулары, репортажлары, Къарачайны белгили джашлары бла къызларыны джашау джолларына аталыб, тарихден сейир хапарла айта эдиле. Ала Ставрополь крайны «Молодой ленинец» деген изданиесинде, «Ленинни байрагъы» газетде, журналлада кёб басмаланыб тургъандыла, область радио бла айтылгъандыла. Кесини аламат статьяларында къыйын джазыуну онглагъан адамланы, халкъны тарихини, Джуртуну патриотларыны юслеринден да джаза эди. Балуа урунууну сюе, аны багъалата биле эди. Ол республикан радиону къарачай бёлюмюню тамадасы болуб да бёлек заманны ишлегенди. «Къарачай» газетни редакциясыны маданият бёлюмюню редактору болуб тургъан заманында да атын сый бла айтдыргъанды. Ол заманда «Джегутинская неделя» деген район, Эл мюлк министерствону «Сельская газета» деген республикан газетинде да редакторлукъ иш бардыргъанды. Аны чыгъармалары Къарачай-Черкесияда, Къабарты-Малкъарда 14 джыйым китабда басмаланнгандыла. Кеси 10-дан аслам китабны авторуду. Ала къарачай, орус, къазах, къыргъыз, тюрк тилледе чыкъгъандыла, школ окъуу пособиелеге салыннгандыла. Джаза улу джюзле бла саналгъан радио бериулени, кёб тюрлю темагъа джазылгъан хапарланы, очерклени авторуду. Ол кеси джашауну бек сюе эди, башхаланы да сюерге юрете эди. Биргесине ишлегенле бла, башхала бла да арасын джылы тутханды. Уллу, гитче да, аны кесине тенгнге санаб, Балуа бла шохлукъ джюрютгендиле. Ол кесини джюрегини ачыкълыгъы бла, сёзюню джумушакълыгъы бла, ашхы сезимлери бла адамлагъа кюч, таукеллик бере эди. Анга тюбеген хар адам къууаныб, ашхылыкъ, игилик этиуню джолуна тюше эди. Аны къуру Къарачай-Черкес Республикада тюл, хоншу республикалада да иги биле эдиле, сюе эдиле.
Аны кърал берген саугъаларыны арасында талай медалы, Хурмет грамотасы, Бюсюреу къагъыты барды.
Ауушханды, Аллахны рахматын табсын.
Лепшокъланы Хусеин.
