Эресейни Федерал налог къуллугъу аскер къаугъагъа къошулгъанла бла аланы юйдегилерини орунларындан тебмеген рысхыларына налог салынмазлыгъын билдиреди.
РФ-ны Президенти Владимир Путин бу къыйын кёзюуде аскер къаугъагъа къошулгъанла бла аланы эт-джен адамларыны энчи рысхыларына налог салмазгъа кереклисин айтханды.
Президентни оноуу бла рысхыларына налог салынмазлыкъланы тизимине СВО-гъа къошулгъанла бла бирге РФ-ны Миллет гвардиясыны къурамында къуллукъ этген, полициячы чынлары болгъанла да киргизилгендиле.
Орнундан тебмеген рысхылары ючюн салыныучу налогну кеси разылыкълары бла кесамат этиб, РФ-ны Сауутлу кючлерине салыннган борчланы толтуруугъа къошулгъанла да, аскер къаугъа бардырылгъан кёзюуде къуллукъ борчларын Украинада, Донецк бла Луганск халкъ республикалада, Запорожье бла Херсон областлада толтургъанла да тёлерик тюлдюле.
РФ-ны Миллет гвардиясыны къурамында къуллукъ этген, полициячы чынлары болгъан, аскер борчларын СВО бардырылгъан джерлени къатларында районлада толтургъан полициячыла да ол налогдан башларына бош этилгендиле.
Бу башында сагъынылгъан адамланы юйдегилери да энчи рысхылары ючюн налог тёлерик тюлдюле.
Аланы бу льготагъа эркинликлери орнундан тебмеген рысхылары болгъан джерде орунлашхан налог органлада белгиленирге керекди.
Джангы джорукъгъа кёре, бу тизгиннге къошулгъан адамланы хар тюрлю затларындан бирерине налог салынныкъ тюлдю. Сёзден, аланы, талайлары бар эсе да, бирер фатарларына, бирер юйлерине, бирер гаражларына дегенча, налог тёлемез эркинликлери барды.
Бу тизгиннге тюшген адамланы рысхыларына налог ала СВО бардырылгъан джерледе къуллукъ этген эмда аскерчилеге болушхан кёзюуде салынныкъ тюлдю.
Табышлылыкъ бла кюреширге джораланнган объектле бла багъалары 300 мелиуан сомдан аслам болгъан объектлеге налог льгота болмагъанын да чертерге керекди.
Аскер къаугъа бла байламлы ишлеге къошулгъанлагъа бу льгота 2022-чи джылдан бери бериледи. Аны бла хайырланыргъа излегенле болушлусуча джазылгъан заявлениелерин Эресейни Федерал налог къуллугъуну сайтында энчи кабинетлеринде джазаргъа, МФЦ-гъа берирге неда почта бла джиберирге боллукъдула.
Кърал учреждениеле бир-бирлерине берген информациядан СВО-гъа къошулгъан адамны налог льготасы болгъаны ачыкъ болса, анга налог салынмай къалгъан адет да барды.
Алай билинмей, льготагъа эркинлиги болгъан адамгъа 2023-чю джылгъа налог тёлеу келсе, ол адам джергили налог къуллукъгъа хапарын кеси билдирирге эркинди.
Аны заявлениесине къараб, налог органланы къуллукъчулары льготагъа тыйыншлы болгъаны бла къалгъанын айтырыкъдыла.
Газетни информацион къуллугъу.
