Багъалы редакция! Арт кёзюуде ара телевидение бла къралгъа белгили адамланы огъуна алдаб, аманлыкъчыла юйлерине, фатарларына ие болгъанларын эшитгенлей турабыз. Аманлыкъ этиуню эбине тюшген адам кимни да алдаргъа боллукъду. Алай болмаз ючюн, фатарны иеси не этерге керекди, анга кесин къорууларгъа мадар бармыды?

Б. Халима.
Черкесск шахар.

Багъалы Халима эгечибиз! Юрист билдиргеннге кёре, адам фатарын эмда башха орнундан тебмеген рысхысын-мюлкюн къоруулар ючюн, тилек къагъыт джазаргъа керекди. Мен кесим болмасам мени затымы башха адамны юсю бла сатаргъа боллукъ тюлдю. Мен ол эркинликни кесимде къояма, деген магъана болургъа керекди тилек къагъытда.
Айхай да, ол тилек къагъыт кёб функциялы аралыкъгъа тюшерге керекди. Тилек къагъытны электрон халда Кърал джумушланы порталына неда Росреестрни сайтында энчи кабинетге джиберирге боллукъду. Бу ишни тындырыр ючюн, адамдан паспортундан башха джукъ изленмейди. Бу джумуш ючюн хакъ алмайдыла.
Аллай тилек къагъыты регистрациягъа тюшген адамны фатарын неда башха мюлкюн-рысхысын киши да саталлыкъ тюлдю.

Газетни информацион къуллугъу.