Олимпия резерв къурау бла байламлы илму-методика ишни тамалында Эресейни Олимпия комитетини «Рекордика» деген инновацион аралыгъыны усталары, Нарсана шахаргъа келиб, Къарачай-Черкесияны спортчуларын сынагъандыла.

«Тест халда теджелген сынаула тренерлени, спортчуланы ишлерин игилендирир, джетишимлерин къатлар мурат бла бардырылгъандыла. Биз Шимал Кавказ федерал округда талай проектни толтурабыз. Нарсанада илму-методика иш эмда спорт хазырлыкъ бла байламлы толтургъан проектибиз аланы бириди. Аны тамалында Эресейни джыйым командаларын сынайбыз. Бусагъатда аллай проектни Шимал Кавказны регионларыны командалары эмда спортчулары бла толтурабыз. Спортчула сынауланы талай тюрлюсюн ётедиле. Аны эсеблерине кёре биз отчёт этиб, тренер штаблагъа, усталагъа, медицина къуллукъчулагъа беребиз», - дейди Эресейни Олимпия комитетини «Рекордика» деген инновацион аралыгъыны Нарсанада бёлюмюню тамадасы Олег Смирнов.
Сынаула спортчуланы къарыуларына-кючлерине, физиология кёргюзюмлерине, къалай къымылдагъанларына дери багъа берирге джораланадыла. Аралыкъны усталары дженгил атлетика, дзюдо бла кюрешгенлени сынаб, кёргюзюмлери иги болгъанын чертгендиле, тренерлени ишлерине да тыйыншлы багъа бергендиле. Джыл джарымны ичинде спортчуланы халларына энтда бир кере къараллыкъды.

САЛПАГЪАРЛАНЫ Умар.