Эресейни МЧС-ни КъЧР-де Баш управлениесини гитче кемелени хакъындан кърал инспекциясыны къуллукъчулары Къобан суу джыйылгъан джерде профилактика иш бардыргъандыла.

Профилактика ишни кёзюуюнде МЧС-ни къуллукъчулары чабакъ тутуучулагъа сууда сакъ болургъа, къоркъуусузлукъну джорукъларын сакъларгъа кереклисин айтхандыла. Чабакъ тутаргъа барырны аллы бла адам юйдегисине къалайгъа, къалай баргъаныны, къачан къайтырыгъыны юсюнден айта кетерге кереклисин да эсгертгендиле.
МЧС-ни къуллукъчулары сууда къоркъуусузлукъ бла байламлы ангылатыу ушакъла бардыргъандыла, джорукъланы эсгертген къагъытла да чачхандыла. Устала айтхандан, кемечикле бла, къайыкъла бла суугъа чыгъарны аллы бла чабакъчыла хауа болумгъа къараргъа, кемеде къаллай бир отлукъ болгъанына эс бёлюрге керекдиле. Ала биргелерине къыбылама неда gps-навигатор алсала тыйыншлыды.
Гитче кемелени хакъындан кърал инспекцияны къуллукъчулары суу джагъада солугъанла бла да ангылатыу-юретиу ушакъла этгендиле.
МЧС-ни къуллукъчулары айтхандан, адамланы къоркъуусузлукъларын бегитиуде быллай профилактика ишле бардырыуну магъанасы уллуду.