Къарачай-Черкесияны Башчысы Темрезланы Рашид, кеси разылыкълары бла къралыбызгъа аскер къуллукъ этерге кёллениб, РФ-ны Къоруулау министерствосу бла кесамат этген джердешлерибизге бир кереге федерал дараджадан берилген 400 минг сомгъа, регионла дараджада да 1,6 мелиуан сом къошаргъа дегенди.
Къыркъар (август) айны 12-де республиканы Башчысы Темрезланы Рашид кесини Телеграм-каналында аскер къуллукъ этерге кесамат этген джердешлерибизге айлыкъларындан тышында РФ-ны Къоруулау министрествосу берген ачхагъа къошакъ этиб, ала бир кереге 2 мелиуан сом алырча этеригин баямлагъанды.
Темрезланы Рашид: «Бюгюнден башлаб, къралыбызны Сауутлу кючлерини тизиминде къуллукъ этерге РФ-ны Къоруулау министерствосу бла кесамат этген джердешлерибизге бир кереге 2-шер мелиуан сом берилликди. РФ-ны Президентини Указыны тамалында федерал аралыкъдан берилген 400 минг сомгъа, регионал бюджетден 1,6 мелиуан сом къошаргъа оноу этгенме», - деб джазгъанды.
Республиканы Башчысы чертгенден, 210 минг сом айлыкълары да къошулуб, аскерчиле бир джылны ичинде 4,5 мелиуан сом алыргъа боллукъдула.
«СВО-гъа къошулгъан аскерчи джердешлерибиз бла барыбыз да ёхтемленебиз. Ала келир заманны къайгъысын эте билген, тири, ётгюр адамладыла. Кеси разылыкълары бла кесамат этиб, къралыбызны политикасын джакъларгъа, къоркъуусузлугъун бегитирге къошулгъан адамла кюнден кюннге кёбден кёб болуб барадыла. Ала, кюн сайын ишлери бла къралыбызны баш байлыгъы джигит джакъчылары болгъанын танытадыла. Аскерчилерибиз, тюзлюкню, рахатлыкъны сакълар ючюн, миллетчилеге къаршчы кюрешни бардыргъан кёзюуде власть органланы баш борчлары да аланы кеслерине да, юйдегилерине да кёлтюргючлюк этиудю», - дегенди Темрезланы Рашид.
Ол айтхандан, аскерчилерибизге федерал, регионал дараджалада болушлукъ этилгенлей турады. Алагъа кёлтюргючлюкге 43 тюрлю мадар къуралгъанды.
Аскерчилеге болушлукъ этген заманда эм алгъа бютеу къралда белгиленнген 20 мадар хайырландырылады. Регионал дараджада къуралгъан 23 тюрлю мадар да алагъа къошакъгъа этиледи.
Сёзден, аскерчилени юйдегилерине регионал Ана капитал биринчи сабий туугъанлай бериледи, алагъа медицина болушлукъ эмда реабилитация этдириледи, социал кесаматны тамалында пособиеле тёленедиле, джерлери болмагъанлагъа джер юлюшле бериледиле. Аны кибик юйлерине газ тартдырыргъа этген джоюмларын эмда сабийлери джюрюген садха тёлеген хакъларын компенсация халда къайтаргъан адет да барды.
