Элия (июль) айны 6-дан 13-не дери Люберцы шахарда грэпплингден Эресейни биринчилиги ючюн эришиуле ётген эдиле. Анга къралыбызны 55 регионундан 1300-ден аслам спортчу къошулгъан эди.
Эришиулеге бизни республикадан да 7 спортчу джаш баргъан эди. Аланы тёртюсю ёчлю орунлагъа ие болуб къайтхандыла. Алайды да, 14-15 джыл болгъанланы арасында Рамиль Жиров (59 килограмм) биринчи орунну, Байчораланы Эльдар да (53 килограмм) экинчи орунну, 16-17 джыл болгъанланы арсында Давлет Физиков (69 килограмм) бла Назир Хапсироков да (63 килограмм) экинчи орунланы алгъандыла.
Спортчуланы Рустам Кемрюгов бла Александр Папандопуло юретедиле.
Хорламгъа ие болгъан джашланы тёртюсю да быйыл аууз-герги (октябрь) айда Къазахстанда дуния дараджалы эришиулеге къошуллукъдула.
Кёб болмай спортчула, тренерлери бла бирге Басманы юйюне келиб, журналистле бла тюбешгендиле.
- Бизни республикада грэпплингден талай спорт клуб ишлегени къууандырады. Алай бла спортну ол тюрлюсю къралыбызда кибик, республикабызда да ёсюм алыб барады. Эришиулеге къошулгъан джети спортчудан тёртюсю ёчлю орунлагъа ие болгъандыла. Рамиль Жиров 2022-чи джыл да чемпион болгъан эди. Бу джол ол тёрт адам бла джыгъышыб, барын да хорлагъанды. Къалгъан спортчула да 4-шер адам бла джыгъышхандыла. Джашла бары да къарыуларын-кючлерин аямай кюрешгендиле. Бизни барыбызны да къууандыргъан неди десегиз, спортчуланы тёртюсю да дуния дараджалы эришиулеге къошуллукъдула, - деди Рустам Кемрюгов.
Байчораланы Эльдар спорт бла кюрешгенли беш джыл болады. Быллай уллу эришиулеге ол биринчи кере къошулгъанды.
- Мен спорт бла 2019-чу джылдан бери кюрешеме. Грэпплингни спортну эм иги тюрлюсюне санайма. Спорт хорламлагъа учундурады, алгъа элтеди, кючлю этеди. Быллай эришиулеге биринчи кере къошулгъанма, бек джаратханма. Спортну сюймесем, хорламлы да боллукъ болмаз эдим. Къазахстанда Дунияны чемпионатына къошулуб, джетишимли болургъа муратлыма. Тренерим Александр Папандопулогъа да, меннге салгъан къыйыны ючюн, джюрек разылыгъымы билдирирге излейме, - дейди Байчораланы Эльдар.
САЛПАГЪАРЛАНЫ Умар.
