Мындан алда Къарачай-Черкес кърал университетде быйыл баш окъуу заведениени бошагъанлагъа аталыб, уллу къууанч джыйылыу ётгенди. Быйыл бакалавриатны, специалитетни, магистратураны эмда аспирантураны дипломларын 1000 адам алгъанды.

Къарачай-Черкес Республиканы окъуу бла илму министри Инна Кравченко джаш усталаны алгъышлагъанды.
«Къарачай-Черкес Республиканы Правительствосуну атындан эмда кесим, сизни таза джюрекден алгъышлайма. Сиз, кърал аттестацияны ётюб, баш билимигиз болгъанын бегитген дипломла алдыгъыз. Студент джылла артда къалдыла, сиз джашауну уллу джолуна чыкъдыгъыз. Бизни къралыбызда кёб тюрлю усталыкъны хайырландырырча мадар барды. Сизни хар биригизни джолугъуз энчиди. Сиз аны тыйыншлысыча ётерча, адамлыкъ шартларыгъызны тас этмезча кюч теджейме. Иги билим алгъаныгъыз ючюн, устазларыгъызгъа, университетни ректору Ёзденланы Таусолтаннга разы боллугъугъузгъа мен толу ышанама. Сау болугъуз, уллу къыйын салыб кюрешгенигиз ючюн. Сизге кючлю саулукъ, узакъ ёмюр, джетишимле теджейме», - дегенди Инна Кравченко.
Къарачай шахар округну мэри Орусланы Марат, университетни ректору Ёзденланы Таусолтан, профессор-устаз коллективни келечилери, атала, анала, чакъырылгъан къонакъла университетни бошагъанланы джылы алгъышладыла.
Джыйылыуну аягъында Эльдар Агачев, Алботланы Марьяна, Рамина Китаева, Дана Лахова, Родион Унаджев, Батчаланы Таулан, Ислам Сатыров, «Шохлукъ-Дружба» деген студент халкъ хореография ансамбль дагъыда башхала джырлаб, тепсеб аламат концерт кёргюздюле.

Узеирланы Хусей.