Мындан алда Къарачай-Черкес Республикада Джамагъат кёлтюргючлюкню штабында Эресейни Почтасыны республикан управлениесини иги ишлеген къуллукъчуларына Хурмет грамотала дагъыда башха саугъала берилди. Ол ашхы иш Эресейчи почтаны кюнюне эмда республикан почтаны 30-джыллыкъ юбилейине аталыб бардырылды.
Ол къууанч ишге келгенлени арасында Къарачай-Черкес Республиканы Халкъ Джыйылыууну (Парламентини) Илмуну, билим бериуню, маданиятны, спортну, джаш тёлю ишле бла туризмни хакъындан комитетини председатели Алексей Ганшин, Эресейни Почтасыны КъЧР-де управлениесини тамадасы Лайпанланы Ахмат, республиканы кърал газетлерини редакторлары, почтаны алчы ишчилери, почта къуллукъну ветеранлары, журналистле дагъыда башхала бар эдиле.
Джыйылгъанла айтхандан, бизни почтаны тарихи Эресей къралны тарихи бла къысха байламлыды. Бизни республикада почта къуралгъанлы 30 джыл болады. Ол кёб тюрлю иш бардырады. Почта къуллукъчула къыш сууукъда, джай иссиде да тутхан ишлерин деменгили толтургъан, ишлерине толу берилген адамладыла. Бу структураны ишчилерини фахмуларыны, билимлерини, тириликлерини кючюнден Эресейни Почтасыны Къарачай-Черкесияда бёлюмю бизни къралыбызда 10 эм игини ичиндеди.
Джыйылыуда биринчи сёз Алексей Ганшиннге берилди. Ол Къарачай-Черкесияны Халкъ Джыйылыууну (Парламентини), бютеу депутат корпусну атындан джыйылгъанланы джарыкъ байрамлары бла алгъышлады. Почта къуллукъну магъанасы джылдан джылгъа ёсюб баргъанын, почта къуллукъчула джигер, джигит адамла болгъанларын айтды. Депутат андан ары сёзюнде, къуллукъну тамалын салгъан бу санагъатны ветеранларына, аладан юрене почтаны ишин деменгили баджаргъанлагъа бюсюреу эте, ала почта къуллукъну бусагъат заманны излемине кёре, тыйыншлы дараджагъа чыгъаргъанларын чертди.
Андан сора Алексей Ганшин атларын махтау бла айтдырыб ишлегенлеге Къарачай-Черкесияны Халкъ Джыйылыууну (Парламентини) Президиумуну Хурмет грамоталарын берди.
Аны ызындан кърал газетлени редакторлары сёлешиб, газетле бла биригиб иги ишлегенлеге грамотала да, башха саугъала да бердиле.
«Къарачай» газетни баш редактору тутхан ишлерин махтау бла толтургъан почтальонлагъа: Огъары Марадан Къушджетерланы Мурадиннге, Джангы Джёгетейден Лепшокъланы Аминатха, Ючкекенден Семенланы Зухрагъа, Терезеден Бостанланы Эльмирагъа Хурмет грамотала бла саугъала берди. Андан сора Ильичёвскоени, Кавказскийни, Николаевскоени, Пристанны, Счастливоени, Джагъаны, Ташкёпюрню, Джангы Джёгетейни, Первомайскоени, Сары-Тюзню, Правокубанскийни, Терезени, Ючкекенни, Элтаркъачны почталарыны къуллукъчулары айырылыб иги ишлегенлерин да чертиб айтды.
КъЧР-ни бир къауум министерствосуну, профсоюзланы, башха структураланы къуллукъчулары да почтада ишлегенлени саугъаладыла.
Эресейни Почтасыны Къарачай-Черкес Республикада бёлюмюню тамадасы Лайпанланы Ахмат, биргесине ишлегенлени алгъышлаб, почтаны тарихини, халкъгъа магъанасыны юсюнден сёлешиб, почтаны шахарлада, элледе ишлеген къуллукъчуларына саугъала берди. Ызы бла бу къууанчха келгенлеге бюсюреу этиб, джюрек разылыгъын билдириб, мындан ары да биригиб ишлериклерине толу ийнаннганын айтды.
Лепшокъланы Хусеин.
