Школлада окъуу джыл тамамланды. Быйыл ненча сохта айырмагъа бошаб, ненчасы да онбир классны бошамай, бирси усталыкъ алыргъа билимлерин ёсдюрюрге деб сабийликден бери джюрюген школларындан кетерикдиле.

Аланы къайсы бири да школларын тансыкълаб турлукълары, окъутхан устазларыны юретгенлери да джашау къыбылама бола, алагъа джюрек разылыкъларын айтырыкълары хакъды.
Алайды да, Важное элде Темрезланы Умарны къызы Аланея да бу школда биринчи классдан башлаб, къуру бешлеге окъугъанды. Ол 9-чу классны тауусханында, анга «Аттестат особого образца» къагъыт берген эдиле. Андан ары джыллада да алай айырмагъа окъугъанды.
Аланея школла арасы эришиуледе огъай эсенг, андан мийик дараджада бардырылгъан олимпиадалада да орус тил, математика, къарачай тил бла адабият, тарих дагъыда башха школ предметледен хаман ал орунланы алгъанлай тургъанды. Джаш тёлюбюзде аллай джетишимлени эшитсек, айхай да, къайсы бирибиз да къууаннган бла къалмай, къайда да ала бла махтанырлай сезимлеге бёленебиз.
Важное элде школну устазлары Аланеяны башха сохталагъа юлгюге тутханлай тургъандыла. Аны сураты гитче класслада окъугъан джылларындан бери школну къабыргъасында айырмачыланы къангасындан тюшмегенди. Ол сохталаны арасында билими бла, фахмусу бла керти айырылыб танылгъан сабий болгъанын, школгъа сый, махтау келтиргенин эсге ала, школну бютеу педагоглары кенгешиб, аны алтын медалгъа теджегендиле.
Энди бу кюнледе, башха школладача, Важное элни школунда Аланеягъа, аны биргесине окъугъан сохталагъа да ахыр къонгурау къагъылгъанды. Ызы бла ала онбир джылны ичинде алгъан билимлерин сынарыкъдыла – экзаменле (ЕГЭ) бериб башларыкъдыла.
Биз да Аланеягъа, къалгъан сохталагъа да экзаменлерин айырмагъа бериб, ол сынауладан дженгил, тынч ётюб, джашауну кенг джолунда да тыйыншлы орун айырыб табар насыбны теджейбиз.

БАТЧАЛАНЫ Фатима.

 
{jcomments}