Хычаман (май) айны 31-де СВО-гъа къошулгъанлагъа кёлтюргючлюк этген «Защитники Отечества» деген кърал фондну бизни регионда бёлюмю ачылгъанына бир джыл болду.

РФ-ны Президенти Владимир Путин СВО-гъа къошулгъанлагъа кёлтюргючлюк этген «Защитники Отечества» деген кърал фондну къураугъа аталгъан Указгъа 2023-чю джыл арттотур (апрель) айны 3-де къол салгъан эди. Ол Указны тамалында былтыр хычаман (май) айны 30-да, 31-де къралыбызны регионларында аны бёлюмлери ачылгъан эдиле. Къарачай-Черкесияда бёлюмю да къошулуб, ала озгъан джылны никкол (июнь) айыны 1-ден бери аскерчилеге не джаны бла да болушханлай турадыла.
Джангы джылны ичинде «Защитники Отечества» деген кърал фондну бизни регионда бёлюмюнде ишлегенле аскерчиле бла байламлы 2400-ден аслам джумушха къарагъандыла.
Кёбюсюне фондха «Урушланы ветераны» деген статусха тыйыншлыла, урушлада джаралы болгъанла, реабилитация ётерикле, аны кибик башха джарсыулары бла байламлы къагъытларын джарашдырыргъа болушлукъ излегенле баргъандыла. Фондну Къарачай-Черкес бёлюмюнде ишлегенле аланы хар бирини джумушуна да къараргъа-джараргъа кюрешгендиле.
Этилген ишлени юслеринден «Защитники Отечества» деген кърал фондну бизни регионда бёлюмюню тамадасы Абазалыланы Мухтарны джашы Марат: «Биз аскерчилеге, аланы юйдегилерине болушуб башлагъанлы бир джыл болады. Къарачай-Черкесияны Башчысы Темрезланы Рашид кеси да, республиканы Правительствосуну ведомствола арасы комиссиясы да кёлтюргючлюк этиб, ол джылны ичинде эки мингден аслам джердешибизни джарсыууна къарагъанбыз. Бизге федерал, регионал дараджада аскерчилеге болушлукъгъа къуралгъан мадарла, льготала бла хайырланыргъа излеген джердешлерибиз келиб тургъандыла. Фондну къуллукъчулары да, къагъытларын джарашдырыб, алагъа тыйыншлы болушлукъну этгендиле.
Медицина болушлукъ эмда психолог реабилитация ётерге излегенлеге да саулукъларын тюзетир мадарла къурагъанбыз», - дейди.
Социал координаторла ёлген аскерчилени, ветеранланы юйдегилерине да болушхандыла.
«Бир джылны мындан алгъа мен, бизни къоркъуусузлугъубузну бегитир ючюн, СВО-гъа къошулуб, джанларын-къанларын аямай, миллетчилеге къаршчы кюрешни бардыргъан джердешлерибизге, не бла болса да, болушургъа излеб, «Защитники Отечества» деген кърал фондну бизни регионда бёлюмюне келген эдим. Алай этгениме бюгюн-бюгече да къууанама. Мында хар адамны джарсыууна да джюреклери къайгъыргъан адамла бла бирге ишлейме. Биз, биригиб, Ата джуртубузгъа кертиликлерин танытхан аскерчилерибизни не тюрлю джарсыуларына да къараргъа-джараргъа кюрешебиз», - дейди социал координатор Анна Асанова.
Сёзден, фондну Черкесск шахарда бёлюмюне СВО-ну ветераны Альберт кесине да, юйдегисине да санаторийде солургъа путёвка алыргъа излеб баргъанды. СВО-да болгъан кёзюуюнде джаралы, ауруулу болгъаны амалтын анга саулугъун тюзетирге керек болгъанды. КъЧР-ни Саулукъ сакълауну хакъындан министерствосу да болушуб, фондну къуллукъчулары Альбертни юйдегиси бла бирге солургъа Нарсана шахарда санаторийге ашыргъандыла.
Къарачай шахардан СВО-ну ветераны Асланнга да урушлада джаралы эмда сакъат болгъаны ючюн къралдан ашау алыб башларгъа болуша турадыла. Ол джумушну баджарыргъа «Главное бюро медико-социальной экспертизы по КЧР» ФКУ да, керекли къагъытланы терк джарашдырыб, джарагъанды. Бусагъатда Асланны къагъытлары ВТЭК-ге хазыр этиле турадыла.
«Защитники Отечества» деген кърал фондну бизни регионда бёлюмюне урушланы ветеранлары болгъанларына шагъатлыкъ этген къагъытларын алыргъа излегенле да барадыла.
«СВО-дан къайтхан аскерчи Валерий фондну Зеленчук районда бёлюмюне келген эди. Ол джарым джылны ичинде къагъытларын джыйышдырыб, урушланы ветераны болгъанына удостоверение алалмай тургъанын айтхан эди. Мен, ол къуллукъ этген аскер бёлекге джазыб, аны къагъытларын алыб, аскер комиссариатха элтирге кереклини барын джыйышдырыргъа болушуб ашыргъан эдим», - дейди социал координатор Инна Цынкова да.
Ол айтхандан, 6 айны ичинде джумушун тындыралмай тургъан Валерий 2 ыйыкъны ичинде удостоверениесин къолуна алгъанды.
Урушланы ветераны Черкесск шахарда джашагъан Рамазан да баргъанды фондха. Ол аскерчилеге кёлтюргючлюкге къуралгъан федерал, регионал таблыкъла бла къалай хайырланыргъа боллугъун билирге излегенди.
«Мен Рамазанны льготаларындан да, ол хайырланыргъа боллукъ башха таблыкъладан да толу хапарлы этиб, ашыргъанма. Бюгюнлюкде ветеранны джумушлары къалай баджарылгъанларына кёз-къулакъ болгъанлай, къысха байламлылыкъ джюрютгенлей турама», - дейди социал координатор Марина Кононенко.
«Защитники Отечества» деген кърал фондну бизни регионда бёлюмюню тамадасы бла къуллукъчулары айтхандан, озгъан джылны ичинде ала аскерчилеге болушханлары бла бирге СВО-ну ветеранларыны кёллерин джарытыр, аланы бош заманларын хайырлы ётдюрюр мурат бла 70 патриот иш бардыргъандыла. Алагъа къошулургъа ёлген аскерчилени юйдегилерин да чакъыргъандыла.
«Биз аскерчиле бла да, аланы юйдгилери бла да къысха байламлылыкъ джюрютгенлей турабыз. Музейлеге, библиотекалагъа бирге баргъаныбыз, табигъатда солургъа чыкъгъаныбыз да болады. Аскерчилени сабийлери бла тюрлю-тюрлю эришиуле, оюнла бардыргъанлай, ала хар неге юренирча, мастер-классла къурагъанлай турабыз.
Юлгюге «Лесной» деген джайгъы лагерде «Академия детства» аралыкъдан сабийлени ветеранла бла тюбешдиргенибизни, Джыджым паркда спорт эмда джарыкълыкъ иш бардыргъаныбызны, Халкъны биригиу кюнюнде аскерчилени сабийлерин тарих киногъа къаратханыбызны, Архызда альпак фермагъа элтгенибизни айтыргъа боллукъма.
Кёб болмай да сабийлени «Истории Церкви и казачества» деген музейге элтиб, «Специальная военная операция» деген экспозициягъа къаратхан эдик. Аны кибик кёб иш бардыргъанбыз.
Ветеранларыбыз джаш тёлюбюз бла сюйюб тюбешгенлерин, магъаналы ишлени юслеринден ушакъ этиуге аталгъан дерследе сабийлени патриот ангыларын ёсдюрюрге джараулу хапарла айтханларын да чертерге излейме.
Ёлген аскерчилеге атаб, школлада эсгериу мюйюшлени, эсгериу къангаланы ачыугъа, Джигитлени парталарын къураугъа да къошулгъанлай турабыз», - дейди «Защитники Отечества» деген кърал фондну бизни регионда бёлюмюню тамадасыны джамагъат проектлени хакъындан орунбасары Азамат Кумуков.
«Защитники Отечества» деген кърал фондну бизни регионда бёлюмю, КъЧР-ни Ёкюл палатасы, Аскер прокуратурасы, Ата джуртну аскерчилерини юйдегилерини комитети, Джамагъатны иш бла баджаргъан аралыкъ дегенча, аскерчилени джумушларын баджарыргъа болушурукъ ведомствола бла да иш джюрютюрге келишгенди.
Этилген кесаматланы себеблеринден ветеранла, аскерчиле, аланы юйдегилери, ёлген аскерчилени эт-джен адамлары юрист эмда психолог болушлукъ табадыла, аланы социал джумушлары да тыйыншлысыча баджарылады.
Мындан ары да джумушлары, джарсыулары болуб, «Защитники Отечества» фондну Черкесск шахарны Гагарин атлы орамыны 24-чю мекямында орналгъан бёлюмюне баргъанлагъа устала, мадаргъа кёре, болушурукъдула.
Фондну ишинден толу хапар 8(8782) 28-41-24 телефон номер бла билирге неда https://t.me/fond_zo_kchr, https://vk.com/fond_zo_kchr, https://ok.ru/profile/ ссылкаланы бири бла Интернетге кириб, окъургъа боллукъду.

ТЕШЕЛЛЕУЛАНЫ Зульфия.