Хычаман (май) айны 29-да Архыз курортда Эресейни Федерал налог къуллугъуну уллу кенгеши болгъанды.

Ол кенгешге къошулургъа деб, бизни регионнга къонакъ болгъан къуллукъчулагъа Къарачай-Черкесияны Башчысы Темрезланы Рашид тюбегенди.
Федерал налог къуллукъну келечилерине къонакъбайлыкъ этгенини юсюнден Къарачай-Черкесияны Башчысы Темрезланы Рашид кесини Телеграм-каналында: «РФ-ны ФНС-ни тамадасы Даниил Егоров бла Эресейни регионларыны налог къуллукъларыны келечилерине хошкелди айтдым.
РФ-ны Президенти Владимир Путин Федерал Джыйылыугъа этген Чакъырыуунда белгилеген ишлени тыйыншлысыча баджарыр ючюн, власть органла инвесторланы кёллендириу, табышлылыкъ бла кюрешгенлеге таблыкъла къурау дегенча ишлени юслеринде Федерал налог къуллукъ бла къысха байламлылыкъ джюрютюрге керекдиле.
Эресейни Федерал налог къуллугъу, джангы технологияланы хайырландырыб, табышлылыкъ бла кюрешгенлеге да, тюз адамлагъа да таблыкъла къурайды. Ол таблыкъла бла хайырланнган адамла налог къуллукъ бла байламлы джумушларын тынч да, дженгил да баджарадыла. Алай этилгенини себебинден, табышлылыкъ бла кюрешгенлени ишлери да ачыкъ кёрюнеди.
Ишни алай таб къурагъанлары, регионланы бюджетлерине тыйыншлы эс бёлгенлери, керекли ишлени дженгил баджаргъанлары ючюн, Даниил Вячеславовичге да, Федерал налог къуллукъда болгъанланы барына да разылыгъымы билдирдим. Ала къуллукъларын деменгили толтургъанларыны себебинден, налогла бла байламлы ишле игиленнген этгендиле, кеслери да дженгил баджарыладыла.
Джюрек разылыгъымы билдире, Эресейни Федерал налог къуллугъуну тамадасы Егоров Даниил Вячеславовичге да, ФНС-ни бир къауум бёлюмлерини тамадаларына да, республикабызны социал-экономика ёсюмюне къошхан юлюшлери ючюн, Къарачай-Черкесияны саугъаларын бердим. Бизни таурухлу джерибизде бардыргъан кенгешлерин файдалы, къурамлы ётдюрюрге теджедим.
Къарачай-Черкесияда болгъан кюнлери эслеринде ашхы ишле бла къалсынла, Эресейни джашнатырыкъ джетишимлеге учундурсунла!» - деб джазгъанды.