Мындан алда Къарачай-Черкес Республикада, Гум Баши ауушда, Къарачай халкъны джангырыу кюнюне аталыб, ат чабдырыу болгъанды.

Аны Къарачай муниципал районну администрациясыны тамадасы Къушджетерланы Спартак къурагъанды. 70-ге джууукъ атлы 2000 метр мийикликде 37 километр узакълыкъгъа чаришге баргъандыла. Алчы болгъан 5 атлыгъа ёчге 1 мелиуан сом салыннганы чаришчилени хорламгъа учундургъанды.
Къарачай халкъны джангырыу кюнюне аталыб бардырылгъан ол ат чабдырыуда Гочияланы Руслан «Наследник» деген къарачай тукъумлу аты бла чемпион болгъанды. Бу атлы белгиленнген джерге 1 сагъат бла 35 минутха джетгенди. Мырзаланы Хусей «Сармат» деген ингилиз-къарачай тукъумлу аты бла 2-чи баргъанды. Роберт Тугов «Мальчик» деген къабарты тукъумлу аты бла 3-чю болгъанды. Темирболатланы Науруз «Ганс» деген къарачай тукъумлу аты бла 4-чю, Алан Асанов «Малыш» деген къарачай тукъумлу ат бла 5-чи орунланы алгъандыла.
Ат чабдырыуну кёзюуюнде конкурсла да къуралгъан эдиле. Алайда эм иги къарачай миллет кийими болгъан, сабийни, таб бёлеб, бешикге салгъан сайланнган эди. Эркишиле, таугъа чабыб чыгъыб, отун джарыб эришгендиле. Андан сора да кёб тюрлю оюн болгъанды.
Чаришге къарагъанлагъа кёз ачыу программа да къуралгъанды. Ингуш Республикадан, Къабарты-Малкъардан келген эмда джергили артистле концерт салгъандыла. Дизайнер-модельер Хапчаланы Зарема тикген кийимле да кёргюзюлгендиле. Алайда хар байрамыбызгъа сюйюб къошулгъан ингуш джырчы Лема Нальгиевагъа къарачай тукъумлу ат саугъа этилгенди. Аны териден этилген ат джери Ингушетияны белгисини сураты эмда Къарачайны байрагъы бла джасалыб болгъанды, юсюне да саугъаланнган къызны аты джазылгъанды. Къонакъ джырчыгъа аламат саугъаны Къарачай муниципал районну администрациясыны тамадасы Къушджетерланы Спартак бергенди.
Лепшокъланы Хусеин.