Кёб болмай Къарачай-Черкес Республиканы ара шахарында, Эресейни Джигити Боташланы Къанаматны 65-джыллыгъына аталыб, уллу джыйылыу болду. Ары бек кёб адам келген эди.
Джыйылыугъа келгенле, ала уа республиканы шахарлары бла районларындан келген эдиле, Къарачайны ётгюр уланыны юсюнден салыннган «Къанатла» деген фильмден юзюкге къарадыла. Андан сора Къарачай-Черкес Республиканы муфтийини орунбасары Батчаланы Мухаммад хаджи дууа этдирди.
Боташ улуну махтаугъа тыйыншлы джолундан Къарачай-Черкес Республиканы Башчысыны атындан КъЧР-ни Правительствосуну Председателини биринчи орунбасары Чеккуланы Хызыр хапар айтды.
- Боташланы Хусейни джашы Къанамат Къарачай-Черкесияны эмда Ата джуртубузну аскер тарихинде энчи орун алады. Ол XXI-чи ёмюрде «Эресейни Джигити» деген сыйлы атха ие болгъан биринчи джердешибизди. Ол Къарачай-Черкесияны уланыды, авиацияны генералыды.
Джашаууну 35 джылын Къанамат Хусеевич Совет Союзну эмда Эресейни Аскер-хауа кючлеринде къуллукъ этиуге бергенди. Джазыу аны Евразияны кёб джерине атханды: Ара Европагъа, Прибалтикагъа, Тау Артына, Поволжьеге, Сибирге, Забайкальеге. Ол, тюз лётчикден башлаб, авиация дивизияны командирине дери ёсгенди, кесини къуллугъунда Боташ улу эм мийик дараджагъа джетгенди. Къанамат аскерчилени джашауларындан терен хапарлы болгъанды, аскер бёлеклени, бирлешликлени джарсыуларына уллу къайгъырыу танытханды.
Джашау джолун лётчик Къанамат Хусеевич керти джигитча тамамлагъанды, аскер къаугъагъа къошулуб, анга салыннган борчну сый бла толтургъанды, аскерчи джашланы джанларын къалдыра, кесини джашауун бергенди. Аскер къарнашлыкъны ажымсыз кёргюзюб, Ата джуртха толу берилмекликни, халал къуллукъ этиуню юлгюсюн танытханды. Ол ёмюрлюкге джюреклерибизде сакъланныкъды, – деди Чеккуланы Хызыр.
Джыйылыуда Къарачай-Черкес Республиканы Халкъ Джыйылыууну (Парламентини) депутаты, «Къарачай – алан халкъ» джамагъат бирлешликни тамадасыны орунбасары Хубийланы Хасан да сёлешди. Ол Боташланы Къанаматны аты унутулмазлыгъын айырыб чертди. Бу затха толу шагъатлыкъды бюгюнлюкде анга берилген сый. Аны аты бла шахарлада, районлада эсгертмеле салыннгандыла, спорт къалалада, окъуу-билим берген учреждениеледе мемориал къангала тагъылгъандыла, майданла, объектле аны атын джюрютедиле. Бу затла барысы да ол ичибизден кетгенликге, аты бизни бла бирге болгъанына юлгюдюле.
Къарачай-Черкесияда джамагъат бирлешликлени миллетле арасы советини председатели Али Асланов да джигит джердешибизни юсюнден кёб ашхы сёз айтды.
– Боташланы Къанаматны мийикге чыгъаргъан джол джетишимле бла саугъаладан толу эди. Алай болса да, Ата джуртну къорууларгъа керек болгъанында, бир джанында къалмай, къралына къуллукъ этерге хазырлыгъын танытханды. Ол джанын-къанын аямай къоруулагъанды Ата джуртун, тенглерине болушлукъгъа дженгил джетгенди. Аны джигитлиги, ётгюрлюгю аскерчи джашланы учундургъанына толу ийнанама, – деб чертди Али Асланов.
Бютюн да Къанаматны юсюнден «Крылья» деген фильмни салгъан Ирина Сынкова сахнагъа чыгъыб сёлешгенинде, бир къауумланы кёзлеринде джыламукъла ойнагъан эдиле, ала джазыкъсынмакълыкъны тюл, ёхтемликни джыламукълары эдиле. Боташ улу, кертиси бла да, Эресейге айтылырча бир джигитлик этиб ёлгенди, аны аты бютеу къралгъа белгили болгъанды.
Джигит Къанаматха сый-махтау бериб сёлешгенлени арасында «Абычарланы союзу» джамагъат бирлешликни джергили бёлюмюню тамадасыны орунбасары, запасдагъы капитан Айбазланы Мурат, Къанамат бла бирге окъугъан аскер лётчик Андрей Калашников, республикан аграр-технология колледжни директору Азамат Матакаев, «Къарачай – алан халкъ» джамагъат бирлешликни Къарачай район бёлюмюню тамадасы Къочхарланы Джашарбек эмда башхала болдула. Ала бир аууздан ич дуниясыны да, тыш къарамыны да ариу болгъанларын чертиб сёлешдиле. Ол, сабийлик кюнюнден башлаб, тенглерине юлгю болуб, алларында баргъанды. Джыйылыуда аскер къаугъада болуб къайтхан Амир Шебзуховгъа да берилди сёз.
– Бюгюнлюкде аскер къаугъагъа къошулгъан джашланы ётгюрлюклери, Боташланы Къанаматны этген джигитлиги джаш тёлюге юлгюдюле. Биз – аскер къаугъагъа къатышханла – тау джуртубуздан келген болушлукъну сезгенлей турабыз, бир-бирибизге керек заманда билек болабыз. Кёб миллетни келечиси, бир джумдурукъ болуб, къралыбызны джаудан къоруулайбыз. Биз хорларыкъбыз! – деди ол.
Къанаматны къарнашы, отставкадагъы полковник Мурадин республиканы башчыларына эмда джамагъатына разылыгъын билдириб сёлешди. Аны атын ёсюб келген тёлюле билир, ол джаш адамлагъа юлгю болур ючюн, кёб иш этилгенин чертди.
- Ол, Джигитча джашаб, Джигитча да ёлгенди, – деб къошду.
Джыйылыуну аягъында, Джигит Къанаматны сыйына деб, келген миллет бир такъыйкъагъа шошлукъгъа бёленди.
Алайды, Теберди ёзенни онглу адамы генерал-майор, лётчик-снайпер атын да айтдырыб, миллетин да, бютеу Кавказны да сыйын кёлтюрюб, Эресейге да керти улан болгъанын танытыб, дунияны да, кюн таякъча, джарытыб, джулдузча батханды. Ол джигитлени джигитиди. Джатхан джери джумушакъ эмда кенг болсун.
Мамчуланы Дина.
