Хычаман (май) айны 24-де, хар окъуу джылны ахырында болуучусуча, республиканы шахарларында, эллеринде къууанч джыйылыула бардырылыб, орта школланы таууса тургъан джашла бла къызлагъа ахыр къонгурау къагъылды.
Ахыр къонгурау къагъылгъанына аталгъан къууанч джыйылыу Элтаркъач элде Эресей Федерацияны Джигити Къаракетланы Кёккезню джашы Юнюсню атын джюрютген орта школда да болду. Быйыл ол школну 9-чу, 11-чи классларын 19 джаш адам бошай эди да, джыйылгъан къауум алагъа алгъыш этди.
Элтаркъач элни администрациясыны башчысы Айбазланы Аскербийни джашы Борис, школну директору Боташланы Рашидни къызы Аминат, РФ-ны МВД-ны ветераны Болурланы Дахирни джашы Леон, сохталаны класс башчылары, биринчи устазлары, атала-анала джаш адамлагъа чууакъ кёкню тюбюнде рахат джашау, узакъ ёмюр, тюз джол, энчи ёсюм теджедиле.
Школдан чыгъарыкъ джашла бла къызла да, аталары-аналарыча къайгъырыб, ариу халиге юретиб, билим бериб, джетишимлеге учундуруб тургъан устазларына разылыкъларын айтдыла.
Адетдеча, школда кеслерин ариу джюрютюб, айырмагъа окъуб, тюрлю-тюрлю эришиуледе хорламлы болуб тургъан сохталаны атлары да махтау бла айтылды. Алайда Чотчаланы Альзирагъа, Умарланы Асиятха, Батчаланы Муслимге дагъыда башхалагъа хурмет къагъытла берилдиле.
РФ-ны МВД-ны ветераны Болурланы Леон школ джашауда кёбчюлюкге магъаналы ишлеге джууаблы устазны (социальный педагог) Ёртенланы Халитни къызы Боташланы Клараны, ёсюб келген тёлюню патриот ангысын ёсдюрюуге уллу юлюш къошханы ючюн, КъЧР-ни МВД-ны Ветеранларыны советини медалы бла саугъалады.
Ызы бла школну айырмалары, выпускниклеге аталыб чам халда этилген назмуланы окъуб, джыйылгъанлагъа кёз ачдырдыла. Кёз ачыу программагъа 1-чи классны сохталары да къошулдула. Ала да джаш адамлагъа алгъышла, назмула айтдыла, тепседиле, эсгериу саугъачыкъла бердиле. Ызы бла уллу той-оюн болду.
Школну таууса тургъан джашла бла къызла, талай джылны узагъына илешген устазлары, шохлары бла айырылгъанларына, камсыкланыр заманлары бошалгъанына бир кесек мыдах болсала да, джашауну уллу джолуна атланнганларына къууаннганлары, алгъан билимлерине база, алгъа таукел къарагъанлары таныла эди.
Энди аланы хар бири джашауну кенг джолунда кесини болумуна, фахмусуна, излемине кёре энчи сокъмакъ сала барлыкъды.
Биз да, ала Джуртубузгъа, миллетибизге джарарыкъ адамла болурларына ышана, ашхы джолгъа атланыгъыз, этген муратларыгъыз толсунла, дейбиз.
БАЙРАМКЪУЛЛАНЫ Зульфия.
