Мындан алда Къарачай-Черкес Республиканы Башчысы Темрезланы Рашид Адыгеяны Башчысы Мурат Кумпилов эмда Къабарты-Малкъарны Башчысы Казбек Коков бла бирге Черкесскеде, «Къарачай-Черкес Республикагъа — 100 джыл» деген паркда, «Мой первый учитель» деген эсгертмени къууанч халда ачды.
Аны ачылгъанына аталгъан джыйылыугъа Къарачай-Черкес Республиканы Халкъ Джыйылыууну (Парламентини) Председатели Александр Иванов, КъЧР-ни Правительствосуну Председатели Мурат Аргунов, КъЧР-ни Халкъ Джыйылыууну (Парламентини) депутатлары, Правительствону къуллукъчулары, Черкесск шахарны мэри Алексей Баскаев, джамагъат бирлешликлени келечилери, устазла къошулгъан эдиле.
Алайда Адыгея Республиканы Башчысы Къарачай-Черкес Республиканы къарнаш халкъын, быллай аламат эсгертме салгъаны ючюн, таза джюрекден алгъышлады.
«Устазны иши бек магъаналыды, джууаблыды. Ол халкъны келлик тёлюсюн хазырлайды. Бизни джетишимлерибиз аны кючюндендиле. Устазла бизни тюз джолгъа саладыла, хар бирибизге ышанадыла, бизни не къыйын болумну да хорларгъа, алгъа учунургъа юретедиле. Артыкъсыз да, бусагъатда бу эсгертмени салыннганыны уллу магъанасы барды. Эресейни джамагъаты, не къыйын болумда да адабиятын, маданиятын, ата-бабадан келген адетлерин ёсдюре, алгъа тири барлыкъды», – деди Мурат Кумпилов.
Аны ызындан Къабарты-Малкъарны Башчысы сёлешди.
«Мен быллай джарыкъ ишге къошулгъаныма бек къууанама. Адамны джашауунда биринчи устаз бек магъаналыды. Ол аны тюз джашаргъа, игилик этерге, патриотлукъгъа, сюймекликге, Джуртха кертиликге, шохлукъ тутуугъа дагъыда башха ашхы ишлеге юретеди, билим береди, маданиятын ёсдюреди. Бу ашхы эсгертме къарнаш республиканы ара шахарын джасарыкъды, устазны къыйын ишини магъанасын чертерге мадар берликди», – деди Казбек Коков.
Къарачай-Черкес Республиканы Башчысы Темрезланы Рашид эсгертмени ачылыуу устазлагъа уллу сый берилгенин, аланы ишлери магъаналы, джууаблы болгъанын билдиргенин айтды. Ол джашла бла къызла школланы бошагъан кюн ачылгъаныны терен магъанасы болгъанын чертди.
«Эресей Федерацияны Президенти Владимир Путин алгъаракъда айтхандан, устазны къыйыны къралда мамыр, рахат джашау орун алыб турурча мадар береди. Эресейни келлик заманы къаллай боллугъу да анданды.
Устазланы акъыллылыкълары, фахмулары, билимлери окъуучуланы илмугъа, джангы технологиялагъа, спорт джетишимлеге, адам сайлагъан усталыгъында къыйын урунууну хорларгъа тирилтеди, таукеллендиреди. Эресейни излемин къоруулагъан джигит аскерчилеге кюч береди», – дегенди Темрезланы Рашид. Башчы эсгертме ачылгъан къууанчда кесини биринчи устазына гокка хансла берди.
«Мен да, мени бла бирге окъугъанла да кесибизни биринчи устазыбыз Елена Мухадиновнаны сый бла эсгеребиз. Акъыллылыгъы, эслилиги, бизге ышаннганы ючюн биз анга бек разыбыз», – деди республиканы Башчысы.
Темрезланы Рашид айтхандан, «Мой первый учитель» деб салыннган эсгертме, сабийлени тюз джолгъа салгъан бютеу устазлагъа да аталады.
«Мой первый учитель» деген эсгертмени джабыуун урунууну ветераны Галина Петровна, «Учитель года – 2024» деген Бютеуэресей конкурсда хорлагъан, Джёгетей Аягъыны 5-чи номерли школуну математикадан устазы Къоркъмазланы Заур, айырмагъа окъугъан «Движение первых» деген къозгъалыуну алчысы, устазла хазырлагъан колледжни студент советинде болгъан Джандубайланы Алина, Эркен-Шахар посёлокну орта школуну 3-чю классыны сохтасы, «Орлята России» деген бирлешликни алчысы Амира Туркменова, Бавуко элни орта школуну 6-чы классыны окъуучусу, «Живая классика» конкурсда ёчлю орун алгъан Мухаммед Шоров ачдыла.
Лепшокъланы Хусеин.
