Ассоциацияны президиумуну членлери тюбешиуню Темрезланы Рашидге власть бла ачыкъ диалог бардырыргъа заман табханы ючюн разылыкъларын билдириуден башлагъандыла.
Шимал Кавказ федерал округну журналистлери оюм этгенден, бу ассоциация кеси да властны органларыны келечилери бла, аны кибик субъектлени башчылары бла таймаздан ачыкъ ушакъла бардырыб турургъа деб къуралгъанды.
Ушакъ эки сагъатны баргъанды. Ол заманны ичинде Шимал Кавказны субъектлерини барыны да тюрлю-тюрлю басма, интернет изданиелерини, теле-радиокомпанияларыны журналистлери, онла бла соруула бериб, алагъа джууабла алгъандыла. Сёз ючюн, ала Къарачай-Черкесияны Башчысына республика кесини 25-джыллыкъ юбилейине къаллай социал-экономика джетишимле бла тюбей тургъанын соргъандыла.
Къарачай-Черкесияны Башчысы, ол соруугъа джууаб бере, озгъан 25 джылны ичинде КъЧР неден да алгъа Россия Федерацияны толу эркинликли субъекти болуб бегигенди, дегенди. Аны уллу магъаналы ишге санаб да сёлешгенди. Регионну экономикасы юч санагъатны - эл мюлк, промышленность, турист санагъатланы - айнытыуну юсю бла ёсюм ала баргъанын чертгенди. Ол бирлемей-экилемей айтхандан, гитче эмда орта бизнесни экономика тириликлерини ёсюулери да ол юч санагъатны айныгъанларына кёре болады.
Ассоциацияны членлери Темрезланы Рашидге Минводла бла Сочиге баргъан джолну ишлеу не халда болгъанын да соргъандыла.
«Къара тенгизге джол ишлеуню проекти Бютеуроссия дараджалы проектди. Биз былайда ол джол Нарсананы Сочи бла байлагъан бла бирге Урал, Приволжский, Къыбыла, Шимал Кавказ федерал округланы Къара тенгизни джагъалары бла да байларыгъын билирге керекбиз. Ол бизге экономика джаны бла бек керекли, бек магъаналы проектди. Аны себеби, биз барыбыз да билгенден, джол бизни къайсы бирибизни да асырагъан санагъатды. Мультипликаторча, джол къурулуш, экономиканы бирси санагъатларын да кесини ызындан элтеди. Аны себебли бу санагъат башха санагъатлагъа да багъалыды эмда магъаналыды. Мен акъыл этгенден, ол, аны бла да къалмай, республиканы экономикасын талай кереге ёсдюрюрча санагъатды. Ол себебден мен бу джол ишленниги джанлыма. Къалай-алай болса да ол джол ишленникди. Биз излеген ол дженгилирек ишленседи», - деб джууаб бергенди сорулгъаннга Къарачай-Черкесияны Башчысы.
Республиканы Башчысына бу къуллукъда ишлеген кёзюуюнде КъЧР-ге энчи халда не игилик этгенин, къаллай джетишимлери бла ёхтемсинирге боллугъун соргъандыла.
Ол да, бу соруугъа джууаб эте, республиканы бюгюннгю джетишимлери къуру аны болмагъанларын, КъЧР-ни уллу командасыны, бютеу республиканы адамларыны кючлери бла этилгенлерин чертгендн.
Ушагъыны аягъында ол, республика кесини 25-джыллыкъ юбилейине тюберге къалай хазырланнганыны юсюнден айтыб, тюбешиуге келгенлени барын да къууанчха чакъыргъанды.
