Бу кюнледе Черкесск шахарны Гутякулов атлы орамында орналгъан Джарыкълыкъ къалада «Бирикген Эресей» политика партияны Къарачай-Черкес регионал бёлюмюню XXVIII-чи конференциясы болду.
Анга партияны джергили бёлюмлерини келечилери, КъЧР-ни Халкъ Джыйылыуу (Парламенти) бла Черкесск шахарны Думасыны депутатлары дагъыда башха хурметли къонакъла къошулдула.
Конференцияда партиячыла, озуб баргъан джылны эсеблей, келир заманнга план салдыла, «Бирикген Эресей» политика партияны Съездине къошуллукъ делегатланы да сайладыла.
«Бирикген Эресей» политика партияны Къарачай-Черкес регионал бёлюмюню секретары, КъЧР-ни Халкъ Джыйылыууну (Парламентини) Председатели Александр Иванов, джыйылгъанлагъа хошкелди айта, доклад этди.
«Эндреуюк (декабрь) айны 1-де «Бирикген Эресей» политика партия 22-джыллыгъын белгилегенди, ол тарих магъаналы байрам бла барынгы да алгъышлайма.
Биз, «Бирикген Эресей» политика партияны Баш Советини члени Темрезланы Рашидни башчылыгъы бла, бирикген тири командабыз. Келишиулю ишлегенибизни себебинден регионубуз ёсюмню джолунда барады.
Саулукъ-эсенлик, рахатлыкъ, партиячы ишлени баджарыуда да, къуллукъ борчларыгъызны толтурууда да хар биринге уллу джетишимле теджейме», - деди А. Иванов.
Хошкелди сёзюню ызы бла ол «Бирикген Эресей» политика партияны регионал бёлюмю да болушуб, СВО-гъа къошулгъан аскерчилеге керекли затла хар ыйыкъ сайын джиберилиб тургъанларыны, аны кибик башха баджарылгъан ишлени юслеринден хапар айтды.
Александр Иванов чертгенден, фронтха бютеулей 800 тоннадан аслам гуманитар джюк ашырылгъанды.
Партиячы проектлени тамалларында республиканы орта школларына деменгили ремонт этиледи, социал халда энчи юйлеге газ тартылады, биринчи медицина болушлукъ этген саулукъ сакълау учреждениеле джангыртыладыла, почта бёлюмледе, юйлеринден узагъыракъ джерледе окъугъан студентлеге джораланнган мекямлада, спорт объектледе, джарыкълыкъ юйледе, аны кибик башха социал магъаналы объектледе да ремонт ишле бардырыладыла.
Докладыны ахырында Александр Иванов: «Партияны джетишимли болдурур ючюн барыбыз да юлюш къошабыз. Ишни аллына бардырыргъа хар биринги да къыйыны киргенди. Мындан ары да иги кёргюзюмлеге учуна, тири ишлеригигизге, не ауур джумушну да бирге баджараллыгъыбызгъа ышанама», – деди.
Конференцияны кёзюуюнде делегатла, къолларын ачыкъ кёлтюрюб, кеслерини излемлери бла болджаллары тауусулгъунчу партияны регионал бёлюмюню Советини къурамындан чыгъаргъа излеген бешеуленни башларына бош этдиле, аланы орунларына башхаланы сайладыла.
«Бирикген Эресей» политика партияны регионал бёлюмюню Советини джангы членлери РФ-ны Кърал Думасыны депутаты Ёзденланы Солтан бла Адыге-Хабль муниципал районну администрациясыны башчысыны къуллукъ борчларын толтургъан Мухтар Астежев, Къобан муниципал районну администрациясыны башчысы Семенланы Ахмат, Къарачай шахар округну мэри Орусланы Марат, Зеленчук муниципал районну администрациясыны башчысыны къуллукъ борчларын толтургъан Александр Шайдаров болдула.
Регионал политсоветни Президиумуну къурамына да джашыртын чёбле атыб, 275 делегатдан 272-си кёлтюргючлюк этгени бла РФ-ны Кърал Думасыны КъЧР-ден депутаты Ёзденланы Солтан кирди.
Алайда «Бирикген Эресей» политика партияны эндреуюк (декабрь) айны 17-де Москвада, ВДНХ-ны джеринде, бардырыллыкъ XXI-чи Съездине бизни республикадан къошуллукъ делегатланы да сайладыла. Бизни региондан ол джыйылыугъа Черкесск шахарны 17-чи номерли гимназиясыны устазы Назира Абдуразакова бла Псыж элде А. Каблахов атлы 1-чи номерли гимназияны устазы Альбина Нурлиева къошуллукъдула.
СОЛТАНЛАНЫ З.
