Эндреуюк (декабрь) айны 5-де КъЧР-ни Джамагъат палатасында «Роль гражданского общества и органов исполнительной власти в оказании помощи, в социальной адаптации участников СВО и членов их семей» деген темагъа кенгеш ётгенди.
Кенгешге КъЧР-ни толтуруучу власть органларыны, джамагъат бирлешликлени келечилери, дин къуллукъчула, аскер комиссариатны башчылыгъы, «Защитники Отечества» кърал фондну КъЧР-де бёлюмюню къуллукъчулары, КъЧР-ни Джамагъат палатасыны членлери къошулгъандыла.
Кенгешде спецоперациягъа къошулгъан джердешлерибиз бла аланы юйдегилерине болушлукъ этиуню, ол ишде тюрлю-тюрлю органланы кючлерин бирикдириуню магъаналылыгъын сюзгендиле. Кенгешге къошулгъанла 2023-чю джыл аскерчиле бла аланы юйдегилерине болушлукъ этиу бла байламлы эсеблени чыгъаргъандыла, этиллик ишлени да белгилегендиле.
Аны бла да къалмай, «Защитники Отечества» кърал фондну КъЧР-де бёлюмю бла КъЧР-ни Джамагъат палатасы байламлылыкъ джюрютюуню юсюнден кесаматха къол салгъандыла.
«Биз аскер къаугъаланы ветеранларына, аланы юйдегилерине болушлукъ этебиз. Тюрлю-тюрлю кърал органла, джамагъат бирлешликле бла байламлылыкъ джюрютгенибиз себебли алагъа тыйыншлы болушлукъ табдырыргъа кюрешебиз. Бюгюнлюкде фондну Къарачай-Черкесияда бёлюмю 1000-ден артыкъ аскерчи бла аланы юйдегисине болушлукъ этгенди. Ол ишге Джамагъат палатаны къошуллугъуну да уллу магъанасы барды», - дегенди «Защитники Отечества» кърал фондну КъЧР-де бёлюмюню тамадасы Абазалыланы Марат.
КъЧР-ни Джамагъат палатасы Бютеуэресей Халкъ фронтну регионал бёлюмюню сопредседатели Геннадий Ждановгъа спецоперациягъа къошулгъанлагъа ашырырча дарман-дары бергенди.
«Биз не заманда да болушлукъ этерге хазырбыз, болушханлай да турабыз. Алай бла Халкъ фронтну чакъырыууна къошулуб, биз, Джамагъат палатаны членлери, аскерчилерибизге деб дарман-дары джыйыб бергенбиз», - дегенди КъЧР-ни Джамагъат палатасы председатели Елена Ляшова.
Аскерчилеге кёл берир муратда, иерей Александр Гурин Воскресенский школну сохталары джазгъан письмоланы бергенди. Алада сабийле туугъан джуртларында аскерчилени къалай багъалатханларын, ала юйлерине къайтырларын ашыгъыб сакълагъанларын джазадыла.
Кенгешни ахырында эсеблени чыгъара, резолюция алгъандыла.
