Байрамны кюнюнде Нальчик шахарны орамлары бла майданлары тюрлю-тюрлю джармалыкъла бла эмда кёрмючле бла джасалыб болгъандыла. Этнография ансамблле шахарчыла бла къонакълагъа республиканы халкъларыны тарихлери бла байламлы концертле кёргюзгендиле.
Къабарты-Малкъарны Россияны къурамына киргенини 460-джыллыгъы бла байламлы Россия Федерацияны Президенти Путин Владимир алгъышлау джибергенди. Аны къууанч джыйылыуда РФ-ны Президентини Шимал Кавказ федерал округда келечиси Белавенцев Олег окъугъанды.
«Сизни барыгъызны да Къабарты-Малкъарны Россия бла биригиуюню 460-джыллыгъы бла алгъышлайма. Бу иш къралны тирихине аны миллет-кърал къуралышын бегитирге, регионда джашагъанланы джазыуларын иги джанына тюрлендирирге юлюш къошхан иш болуб киргенди. Сизни кесигизни буруннгуларыгъызны кёб тёлюлерини аскер джигитликлери бла эмда урунуу хорламлары бла, бизни культура, иннет-тин байлыкъларыбызны къатларгъа къошхан онглу юлюшлери бла ёхтемленирге толу эркинлигигиз барды», - деб джазылгъанды Россия Федерацияны башчысыны алгъышлауунда.
Къабарты-Малкъарны адамларын бу сыйлы байрамлары бла Россия Федерацияны Федерация Советини Председатели Матвиенко Валентина да алгъышлагъанды. «Биз кёб къыйынлыкъла бла сынауланы айланчларын бирге хорламлы ётгенбиз. Республиканы бютеу тарихи сизни махтаулу джеригизни халкъларыны бизни ара Джуртубузгъа, аны ара излемлери бла тырмашыуларына халал къуллукъ этиуню юлгюсюдю», - деб айтылады анда.
Къарачай-Черкесияны Башчысы Темрезланы Рашид Къабарты-Малкъарны Россияны къурамына киргенини 460-джыллыгъы бла байламлы айтхан алгъышлауунда бюгюннгю республиканы ол заманда халкъларыны этген ишлери регионда джашауну ёсдюрюрге къуллукъ этгенлерин чертгенди. Къарачай-Черкесияны адамларыны атларындан да, кесини атындан да ол Къабарты-Малкъар Республиканы Башчысы Коков Юрийни эмда республиканы джамагъатын бу уллу къууанчлары бла алгъышлаб, регионну Россияны къурамына киргени аны халкъларына къраллыкъларын къураргъа болушханын айырыб чертгенди.
«Бюгюн бизни республикаларыбызны бир кърал - Россия - бирикдиреди. Биз барыбыз да, мында бизни къралыбызны бусагъатдан да бай, бусагъатдан да кючлю болурун излеб, аны ёсдюрюрге юлюш къошаргъа тырмаша джашайбыз. Къабарты-Малкъаргъа рахатлыкъ, джангы джетишимле, ашхылыкъла теджейме», - дегенди Къарачай-Черкесияны Башчысы, алгъышлауун тамамлай.
Артда Темрезланы Рашид, Ингушетияны Башчысы Евкуров Юнус-Бек, Ставрополь крайны губернатору Владимиров Владимир, Адыгеяны Башчысы Кумпилов Мурат, Къабарты-Малкъарны Башчысы Коков Юрийге тюбеб, Тырныаузда болгъан табигъат чарпыулада адамла ёлгенлери бла байламлы къайгъы сёз бергендиле, аны бла бирге табигъат джарсыуладан тюшген къоранчланы орунларына салыргъа болушургъа хазыр болгъанларын да билдиргендиле.
