Байрым (февраль) айны 15-де Черкесск шахар поликлиниканы баш врачы Зураб Гогушев республикан газетлени журналистлери бла пресс-конференция бардыргъанды. Анда сёз шахар поликлиниканы Черкесскени шимал джанында ачылгъан филиалыны юсюнден баргъанды.
Зураб Гогушев айтхандан, шахар поликлиниканы ара мекямы тарлыкъ этгени, адамла кёб болгъанлары амалтын Черкесскени шимал джанында орналгъан тийресинде джангы мекям ишлениб, поликлиниканы бир къауум бёлюмюн ары кёчюрюрге деб оноу этилген эди.
- Поликлиникада саулукъларына къаратханланы саны джыл сайын ёсюб барады. Бюгюнлюкде аланы саны 71 мингнге джетеди, поликлиниканы штаты да анга кёре къуралгъанды. Аны айтханым, адамла кёб джыйыла эдиле, медицина къуллукъчулагъа да кабинетле эркин джетишмей эдиле. Алай бла поликлиниканы кенгертирге керек эди. Черкесскени шимал джанында ишленнген мекям хайырланыугъа берилгенинде, ара поликлиниканы бир къауум бёлюмюн, врачланы ары кёчюрдюк, - деб хапар айтды Зураб Гогушев. – Поликлиниканы филиалы Свободы орамны 62-чи юйюнде орналады. Ары 1-чи номерли терапевт бёлюм (аны къурамына 12 участок киреди), медицина реабилитация бёлюм, бирер невролог, хирург, травматолог, кардиолог, УЗИ эмда КТ диагностика, паллиатив болушлукъ этген врач кёчюрюлгендиле. Джангы мекямда амбулатор халда онкология джаны бла болушлукъ этген аралыкъ да орналады. Кёб турмай медицина реабилитация бёлюмге да джангы оборудование берилликди.
Поликлиниканы баш врачы кюндюзгю стационарны ишини юсюнден соруулагъа джууаб бере, стационар эки мекямда да ишлегенин айтды.
- Кюндюзгю стационарны бир бёлюмюн да кёчюргенбиз поликлиниканы филиалына. Ара мекямда да кюндюзгю стационарны эки бёлюмю алгъынча ишлеб турадыла. Алгъын джыллада кюндюзгю стационаргъа джюрюгенле, орунла аз болгъаны амалтын, кёзюулерин сакъларгъа керек бола эдиле. Энди поликлиниканы кенгертгенибиз себебли, аллай джарсыула къоратылгъандыла. Джангы мекямдагъы кюндюзгю стационар хар неси да таб джарашхан бёлмеде орналады, орунлары да эркинди. Адамла келиб, буюрулгъан процедураланы заманында этдириб кетедиле.
Поликлиника керекли устала бла 99,2 процентге баджарылыбды. Алгъаракълада терапевтле джетишмей эдиле. 2022-чи джыл врачла бизде ишлерге кёлленирча мадарла къураб, терапевт участокланы барысын да устала бла баджаргъанбыз, - деди Зураб Гогушев.
Шахар поликлиниканы филиалы орналгъан джерге джамагъат транспорт къалай джюрюгенини юсюнден да айтылды пресс-конференцияда.
- Химзаводха джюрюген рейслени кёбейтгендиле. Кёб болмай, биз остановкагъа чыгъыб, автобусланы къалай джюрюгенлерине къарагъан эдик. Айтыргъа, биз остановкада тургъан 5 минутну ичине юч автобус келди. Эртденбла джолда кёб машина джюрюгени амалтын автобус кечигирге боллукъду, алайсыз ала тохтаусуз джюрюйдюле. Поликлиниканы джангы мекямы орналгъан джерни къатында да автобус остановка ишленникди, - деди поликлиниканы баш врачы.
Зураб Гогушев поликлиникада диспансеризацияны бардырыу иш къалай къуралгъанындан да хапар айтды.
- Бюгюнлюкде поликлиника керекли затла бла толу баджарылыбды. Поликлиниканы лабораториясында да кёб тюрлю анализ этерге боллукъду. Аны себебли адамлагъа диспансеризацияны толу ётерча мадарла къуралгъандыла. Ол ишге поликлиниканы администрациясы да уллу эс бёледи… - деди ол.
САЛПАГЪАРЛАНЫ Умар.
