Байрам (февраль) айны 15-де Ата джуртдан тышында аскер къуллукъларын толтургъан эресейчилени эсгериуню кюнюн белгилейбиз. Совет Аскер Афганистанны джеринден чыгъарылгъанына быйыл 34 джыл толду. Алгъын джыллада ол кюн «афганчыланы» байрам кюнлерича ёте эди. Бирлерине байрам болса да, башхалагъа уа бу кюн ёлген аскерчи тенглерин эсгериуню кюнюдю.
Бизни джердешлерибиз Ата джуртдан тышында, сауутланнган даулу, къаугъалы киши джуртда, 30 къралда къуллукъ этгендиле. Артыкъсыз да бек бу кюн Афган къазауатны ётгенлеге ёмюрде да унутулмазлыкъ кюндю. Къарачай-Черкесияны кёб джашы ол урушну отун джырыб ётгенди. Амма, бу кюн ачы татыуу да болгъан кюндю: кёб джигитни джашауу къазауат шынгкъартында кюйгенди. Хазна къалмай 10 джылны узагъына баргъан къазауат 14 мингден аслам джашны, аланы ичинде бизни республикадан да 42-ни, джашауларын юзгенди. Ата джуртларыны аллында борчларын сый бла толтура джан берген джигитлеге ёмюрлюк сый эмда махтау тыйыншлы болгъаны хакъды.
Къарачай-Черкесияда байрым (февраль) айны 15-де республиканы ара шахарында Хорламны аллеясында афганчылагъа аталгъан джыйылыу болду. Джыйылыугъа Къарачай-Черкесияны Башчысыны эмда Правительствосуну Администрациясыны тамадасыны биринчи орунбасары Хубийланы Марат, Къарачай-Черкес Республиканы Правительствосуну Председателини орунбасары Бугаев Дмитрий, КъЧР-ни Халкъ Джыйылыууну (Парламентини) илмуну, окъууну, санатны, спортну, джаш тёлюню ишлерини эмда туризмни хакъындан комитетини председатели Ганшин Алексей, власть органланы эмда кърал структураланы къуллукъчулары, афган къазауатны ветеранлары, джамагъат бирлешликлени келечилери, Черкесск шахарны школларыны устазлары бла сохталары, Афганистанда джан берген джердешлерибизни джууукъ адамлары, дин къуллукъчула, журналистле да къошулгъан эдиле.
Совет джуртну буйругъун толтура Афганистанда къазауатда джан берген джигитлерибизни эсге тюшюре, мыдах болмагъан адам къалгъан болмаз эди алайда. Джуртубуздан тышында къуллукъ этгенлени джигитликлерине, батырлыкъларына сый-махтау бериб сёлешдиле. Афган къазауатны сакъатларына къарагъан джамагъат бирлешликни КъЧР-де бёлюмюню тамадасы Жданов Геннадий да сёлешди.
- Ата джуртну излемин толтуруу хар аскерчиге да баш борчду. Афганистанда къуллукъ баджарыб къайтханла, аяусуз сермешледе юлгюге айтырча чыдамлылыкъ, эркишилик да танытхандыла, ётгюрлюк, джигитлик кёргюзюб махтаулу болгъандыла. Ала салыннган борчну сый бла толтуруб, Ата джуртну аллында берген антларына кертилей къалгъандыла. Уруш тюзде джан берген джердешлерибизни сыйына аталгъан джыйылыугъа келгенлеге, къалгъанлагъа да мамыр джашау, саулукъ теджейме, - деди Геннадий Жданов.
Аланы къуллукълары эресейчи аскерни эндиги аскерчилерине эркишилик бла ётгюрлюкню юлгюсю болгъанды. Бюгюн да кёбле сафдадыла. Урушлада бирликни бузулмазлыкъ адетлерин аяулу сакълай, ала джаш къауумгъа бередиле.
Джыйылыуну аягъында келгенле интернационал борчларын толтура Афганистанда джан берген 42 джердешибизге сый бериб, алагъа аталгъан эсгертмеге гокка хансла салдыла.
(БИЗНИ КОРР.).
