Байрым (февраль) айда къралыбызда талай джангы закон ишлеб башларыкъды. Бюгюн газет окъуучуларыбызны ол законла бла шагъырей этерге излейбиз.
Байрым айны 1-ден
Ана капитал
Ана капиталны ёлчеми, керти (фактический) инфляциягъа кёре, 11,9 процентге ёсерикди. Алай бла аны ёлчеми биринчи сабийге 586 946,72 сом, экинчи сабийге 775 628,25 сом боллукъду. Ана капиталны джарашдыргъан юйдегиге экинчи сабий тууса, анга 188 681,53 сом къошуллукъду.
Бир къауум социал
пособиелени ёсдюрюу
Ана капиталдан сора да талай пособиени ёлчеми 11,9 процентге ёсерикди. Сёз ючюн, сабий тууса бир кере берилген пособие 22 909,03 сом боллукъду. Сабийге къарагъаны ючюн хар ай сайын берилген пособиени ёлчеми да эм азы бла 7925,71 сомгъа джетерикди.
Интернет бла байламлы законну юсюнден
Автоном системаны номерлери бла хайырланнган операторла связь мадарла кереклисича ишлерча этиуню юсюнден излемлени бузсала, административ джууаблылыкъгъа тартыллыкъдыла.
Ол тюрлениуле «Об обеспечении устойчивого, безопасного и целостного функционирования интернета на территории РФ» деген законну излемлерин толтуруу бла байламлыдыла.
Байрым айны 3-ден
Кърал къоркъуусузлукъну органларыны
ишлери
Энди ФСБ-ны, СВР-ны, ФСО-ну, Къоруулау министерствону, МВД-ны ишлери кърал эмда муниципал джумушланы баджарыу бла байламлы боллукъ тюлдю. Алай бла ол органла ишлеринде къаллай мадарланы хайырландыргъанларын бегирек сакъларгъа боллукъду.
Уучулукъ санагъатда кърал контроль
Кърал инспекторла кёзюу-кёзюую бла рейдле бардырыб, законну бузулгъанын ачыкъларча эмда профилактика ишле бардырырча деб уучулукъ бла байламлы законнга тюрлениуле кийирилликдиле.
Андан сора да, инспекторла аманлыкъчыланы тутар ючюн кеслерини кючлерин эмда сауутларын хайырландырыргъа эркинликлери барды. Законнга ол тюрлениуле браконьерлеге къаршчы кюреш бардырыр нюзюр бла этилгендиле.
Байрым айны 4-ден
Джашар джер бла
баджарыу
Аскер къуллукъдан башларына бош этилгенлеге берилирге деб буюрулгъан, алай а керек болмай къалгъан юйлени регионал властла юй алыргъа кёзюулерин сакълаб тургъан аскер къаугъаланы ветеранларына, сакъатлагъа, сакъат сабийлери болгъан юйдегилеге берирге боллукъдула.
Байрым айны 20-дан
Спецоперациягъа
къошулгъанланы
сабийлерин ВУЗ-лагъа алыу
Бакалавриат бла специалитет программалагъа окъуугъа алыу бла байламлы джорукъла «О квоте для детей участников специальной военной операции» деген законнга кёре джарашдырылыргъа керекди.
Басмагъа САЛПАГЪАРЛАНЫ Умар хазырлагъанды.
