«Аскер къуллукъ этерге контракт бегитген заманымда «Отха, суугъа кир!» деген буйрукъ берилсе да, аны толтурургъа керек болгъанымы иги ангылаб къол салгъан эдим. Ол кюн этген антыма керти болургъа кюрешгенлей барама», - дейди Эбзеланы Руслан.

Джердешлерибизни бир талайы, Украинада бардырыла тургъан спецоперациягъа къошулуб, анда миллетчилеге къаршчы урушлада джигитликле кёргюзюб, аскер борчларын мийик дараджада толтургъанлары бла кърал саугъалагъа тыйыншлы болгъандыла. Алай бла эллерине-джерлерине уллу сый, махтау келтиргендиле.
Чапаевское элден Эбзеланы Тавсултанны (къагъытларында джазылгъаныча) джашы Руслан да аллай махтаулу джердешлерибизни бириди. Руслан туугъан элинде орта школну джетишимли тауусханындан сора 01485-чи тау моторлу мараб атыучу джаяу бёлекде аскер къуллугъун толтуруб, юйюне джыйылгъанды. Сабийлигинден санларын чыныкъдырыугъа иги эс бёлген джаш школда, аскерде да бел тутуш, аскер тюйюш (армейский рукопашный бой) дегенча спорт кюрешледен къуралгъан тюрлю-тюрлю дарадажалы эришиуледе ёчлю орунланы алыб тургъанды. Эбзе улу гитчелигинден бери шахматлагъа да устады.
Хар неде да джетишимли Русланнга усталыкъ сайлар кёзюу джетгенинде ол КъЧГТА-да баш билим алыб, эл мюлк продукталаны юслери бла технолог болгъанды. Артда юристликге да окъугъанды. Алай болса да, алгъан усталыкъларына уллу кёлленмей, аладан эсе аскер къуллукъну сайлаб, ол контракт бла 2015-чи джыл Сторожевой станседе орналгъан 34-чю тау моторлу мараб атыучу бригаданы къурамына киргенди.
Андан бери аскер къуллукъну эбине тюшюб, Эбзе улу анга салыннган борчланы тыйыншлысыча толтургъанлай турады. Украинада спецоперация башланнганы, анга къошулургъа кереклиси айтылгъанында да, Ата джуртха керек заманда артха турмай, Руслан башха аскерчиле бла бирге ары кетгенди. Алай бла ол Херсон, Николаевское областлада урушлагъа къошулгъанды. Анда 34-чю аскер биригаданы къурамында бёлек аскерчиге башчылыкъ этгенди.
Тыйыншлы оноулары бла башчылыкъ этген аскерчилерин ёлюмден сакълай, урушлада уллу джигитликле этгени ючюн, Эбзеланы Руслан Жуковну медалы бла саугъаланнганды.
Къатында окъ-тоб атылгъанындан санына уллу хыянат джетмесе да, Руслан талай кере контузия болуб аязыгъанды. Бу джол бегирек контузия болгъанында аны терк огъуна Херсон шахарда госпиталгъа, алайдан да Севастополда госпиталгъа ашыргъандыла. Саулукъ сакълагъан учреждениеледе бир кесек багъылгъанындан сора маджалыракъ болгъаннга санаб, Русланны Бештау шахарда санаториягъа джибергендиле. Анда да 21 кюнню саулугъун бегитиб, артда да кесин тинтдире турургъа кереклисин айтыб, Эбзе улуну юйюне ийгендиле.
Мен анга спецоперациягъа къошулгъан аскерчи джердешлерибизни джашауларындан-ашауларындан, аланы къолларында болгъан окъдан-тобдан хапар соргъанымда, Руслан: «Къралыбызны рахатлыгъын сакълау эмда политикасын джакълау бла байламлы бизни бойнубузгъа салыннган борчну толтурургъа керек эдик да, спецоперациягъа таукел къошулгъан эдик. Къайры баргъаныбызны билиб атланнган эдик. «Хан» тепсиле, тёше орундукъла сакъламагъанларын, саулугъубузгъа, джаныбызгъа да къоркъуулу болгъанын биле эдик. Аны ючюн, ууакъ-тюек затла бир кесек табсыз тийгенлерине тарыгъыргъа да джарарыкъ тюлдю. Юйдеча, керпеслениб турабыз десем а, сиз да ийнанмагъыз.
Белгилисича, къайда да, азы-кёбю болса да, ол къолундагъын джарашдыра билген, эринмей дыгалас этген адамла кеслерин инджитмейдиле. Анда да чот алайды. Не тюрлю таблыкъгъа, игиликге да юрениб тургъан адамлагъа бир кесек къыйыныракъ тие болур, сёз джокъду. Отун тюшюре, малгъа къарай, суу келтире чыныгъыб ёсген элчи джашла уа анда джашау турмушларын келишдиредиле.
Сауут-саба, окъ-тоб джетмейди, ашсыз-суусуз къалабыз деб да айталлыкъ тюлме. Хар не да бериледи. Тегаран, къызыу урушла бара тургъан кёзюуде ауузланыр, солур заман болмайды. Сёзден, джауну огъу-тобу башыбыздан къуюлуб, талай кюнню окопада тургъаныбыз болгъанды. Ол болумда джанынг къалгъанына «шукур Аллахха» дегенден башха джукъ излерге керек болмаз деб ангылайма», - деди.
Руслан хапарында Къумушдан Бытдаланы Исмаил бла Зеленчук станседен Теуналаны Артургъа да уллу махтау салды.
«Исмаил бла Артур, кеслери къуллукъ этген аскер бёлек къошулмагъан урушну кёзюуюнде бизден джашла джауну огъуну-тобуну тюбюне тюшгенлерин билгенлеринде, камазла бла алайгъа барыб, джаралы аскерчилени чыгъаргъанларын кесим кёргенме. Сау болсунла, башхаланы джанларын къалдырыр ючюн кеслерине къоркъуу бола тургъанлай ол джигитликни этгенлерине», - дейди Эбзе улу.
Аны хапарына тынгылай, бу джашла быллай къыйын болумда украиначыланы миллетчиледен азатлаб кюрешген эресейчи аскерчилеге джергили джамагъат къалай къарагъанын билирим келди.
Ол сорууума да: «Орус тилли джамагъат бек «джагъылады», башхалары уа кишиге да уллу кёл берирге излемейдиле. Ала бизни да, кеслерини аскерчилерин да алай уллу бюсюремейдиле. Бары да спецоперация бошалырын бек ашыгъыб сакълайдыла», - дейди Руслан.
Къралыбызны къоркъуусузлукъну бегитиуге, хоншуларыбызны миллетчиледен азатлаугъа аталгъан политикасы толтурулуб, спецоперация бошалырын, аскерчи джердешлерибиз юйлерине сау-саламат къайтырларын, биз да бек излейбиз. Аллах айтса, ол кюн да къысха заманда джетер. Бюгюнлюкде Ата джуртубузну къоруулаб кюрешген Эбзеланы Руслан, Бытдаланы Исмаил, Теуналаны Артур ала кибик башха аскерчиле да юйлерине сау-эсен къайтыб, рахат джашарла деб ышанабыз.

ТЕШЕЛЛЕУЛАНЫ Зульфия.

 
{jcomments}