Къарачай-Черкесияны Миллет ишлени, кёбчюлюк коммуникацияла бла басманы хакъындан министерствосу 2022-чи джылгъа чыгъаргъан эсеблеге кёре, былтыр бизни республикада джашагъан миллетлени араларында келишиулюкню ёсдюрюуге аталгъан 150 иш этилгенди.
Къралыбызгъа санкцияла салыныб, кёбчюлюкге джайылгъан ётюрюк хапарлагъа керти информацияны кючю бла къаршчылыкъ этилген кёзюуде Къарачай-Черкесияны Миллет ишлени, кёбчюлюк коммуникацияла бла басманы хакъындан министерствосуну излеми бла джаш тёлюге джораланнган лекцияладан къуралгъан «Диалоги о важном» деген проект толтурулуб башланнганды. Аны тамалында Къарачай-Черкесияны 1000-ден аслам сохтасы бла студенти эресейчи устала бла тюбешиб, РФ-ны кёб миллетли джамагъатыны бирлигин ангылатыугъа аталгъан ушакъла этгендиле.
Джаш адамланы патриот сезимлерин ёсдюрюр мурат бла Къарачай-Черкесияны 100-джыллыкъ юбилейине аталгъан байрамны тамалында «Межкультурный диалог 2022» деген регионла арасы джаш тёлю форум да бардырылгъанды. Анга Къарачай-Черкесияны келечилери бла бирге Адыгея, Къабарты-Малкъар республикаладан 100-ден аслам джаш адам къошулгъанды.
«Межкультурный диалог» деген форум «Реализация государственной национальной политики Российской Федерации» деген кърал программаны тамалында къуралгъанды. Ол бизни республикада 2017-чи джылдан бери бардырылады. Озгъан джыл ол регионла арасы джаш тёлю форум ШКФО-ну 3 республикасыны - Къарачай-Черкесияны, Адыгеяны, Къабарты-Малкъарны - 100-джыллыкъ юбилейлерине аталгъан эди.
Дагъыда Къарачай-Черкесияны Миллет ишлени, кёбчюлюк коммуникацияла бла басманы хакъындан министерствосу терроризм бла экстремизмни идеологияларына къаршчы профилактика ишле да бардыргъанды.
Ол министерствону башламчылыгъы бла Интернетде экстремист иннет бла джазылгъан материалланы мониторингин бардырыб, аланы хапарларын джорукъ сакълагъан органлагъа билдирлик кибердружинник къауум къуралгъанды.
2022-чи джыл джаш тёлюню террорист, экстремист ишледен сакълар мурат бла 20 минг буклет чыгъарылгъанды. Ол темагъа «Лучший телевизионный сюжет», «Лучший телевизионный публицистический материал», «Лучшая авторская работа», «Лучшая газетная публикация на русском языке», «Лучшая газетная публикация на карачаевском языке», «Лучшая газетная публикация на черкесском языке», «Лучшая газетная публикация на абазинском языке» «Лучшая газетная публикация на ногайском языке», «Лучшая интернет-публикация», «Лучшая публикация внештатных авторов или корреспондентов» деген номинацияла бла республикан СМИ-леде эм иги материалла чыгъаргъан авторла саугъаланнгандыла.
Къарачай-Черкесияны Миллет ишлени, кёбчюлюк коммуникацияла бла басманы хакъындан министерствосу быйыл кёбчюлюк коммуникацияла бла байламлы андан да кёб иш этиллигин билдиреди.
