Эндреуюк (декабрь) айны ал сюреминде Черкесск шахарда «Юбилейный» деген спорт къалада спортну миллет эмда олимпия оюнлагъа къошулмагъан кюрешлеринден Къарачай-Черкесияны 100-джыллыкъ юбилейине аталгъан фестиваль-конкурс бардырылгъанды. 

Аны тамалында къуралгъан эришиулеге республиканы бютеу районларындан 2008-чи – 2010-чу джылгъы спортчула къошулгъандыла.
Тарих магъаналы юбилейге аталыб бардырылгъан фестивалда хорлагъан эмда ёчлю орунланы алгъан спортчуланы КъЧР-ни Физкультура бла спорт министерствосу хурмет грамотала, кубокла эмда медалла бла саугъалагъанды.
Эришиуледе Ёртенланы Науруз, Хасанланы Алихан, Мижев Амаль, Къалаханланы Арафат, Гаталаны Эльдар, Хакиров Алим, Тоторкъулланы Ислам, Токъланы Амир, Катаганов Абдул-Малик, Курелов Аслан кеслерини ауурлукъларында спортчуланы барын хорлагъандыла.
Тоторкъулланы Имран, Ёзденланы Хаким, Къоркъмазланы Аслан, Гаджаланы Кемал дагъыда башхала 2-чи орунланы алгъандыла.
Мамчуланы Ибрагим, Къоджакъланы Темирлан, Токъланы Ислам, Таушуналаны Керам, Ачабайланы Мурат, Дотдуланы Хаджи-Дауут, Эзиланы Таубий, Деккушланы Аслан, Чыпчыкъланы Алий, Байчораланы Хаджибий, Ёзденланы Амир, Эбзеланы Эльдар да 3-чю орунлагъа тыйыншлы болгъандыла.
«Мен спорт бла гитчелигимден бери кюрешеме. Бу джолгъа дери да тюрлю-тюрлю дараджалы эришиуледе ёчлю орунланы ала тургъанма. Къарачай-Черкесияны 100-джыллыкъ юбилейине аталгъан эришиуледе хорлагъаныма уа артыкъ да бек къууаннганма», - дейди Элтаркъач элни орта школуну 6-чы классыны сохтасы Ёртенланы Науруз.
Джетишимли спортчуланы тутушургъа Тоторкъулланы Ансар, Темрезланы Мурат, Боташланы Руслан, Чомаланы Джохар, Тохтауулланы Эльдар, Токъланы Арсен, Къушджетерланы Радмир, Гаталаны Тимурлан дагъыда башхала юретгендиле.

СОЛТАНЛАНЫ З.