Эресей Федерацияны Правительствосуну 2021-чи джыл эндреуюк (декабрь) айны 24-де чыкъгъан 2464-чю номерли бегиминде къуллукъчуланы, ишчилени да урунууну къорууларгъа юретирге эмда ол джаны бла аланы билимлерин ачыкъларгъа джораланнган джангы джорукъла белгиленнгендиле.

Ол бегимни 3-чю, 4-чю пунктлары 2022-чи джыл алтотур (март) айны 1-де хайырландырылыб тебрегендиле, къалгъаны да кючюне быйыл къыркъаууз (сентябрь) айны 1-де киргенди. Анда белгиленнген джорукъла 2026-чы джыл къыркъаууз (сентябрь) айны 1-де дери хайырландырыллыкъдыла.
Правительствону ол бегимини 78-чи, 99-чу пунктларында джазылгъаннга кёре, иш бергенле бла ишчилени урунууну къорууларгъа юреннген хапарлары Эресейни Урунууну хакъындан министерствосуну урунууну къоруулау системасында организацияланы неда табышлылыкъ бла кюрешген адамланы энчи кабинетлерине салыныргъа керекди.
104-чю-116-чы пунктлада да аллай информация ишчилерин урунууну къорууларгъа юретген организацияла бла бизнесменлени юслеринден информацияны реестрге тюшюрюлюрге кереклиси джазылгъанды.
Джангы джорукъланы 118-чи, 119-чу пунктларында да урнууну къорууларгъа юреннген адамланы эсебге тюшюрюуню юсюнден айтылгъанды. Бу джорукъла келир джыл алтотур (март) айны 1-ден хайырландырылыб башланныкъдыла.
Джангы джорукъла кесамат бегитиб, ишге чыкъгъан адамла бары урунууну къорууларгъа тыйыншлысыча юренирге кереклисин белгилегендиле.
Урунууну къоруулаугъа юретген организацияла бла бизнесменлени джууаблылыкълары да анда кескин джазылгъанды.
Джангы джорукълагъа кёре, къуллукъчуланы, ишчилени да урунууну къоруулаугъа юретген организацияла бла бизнесменлени Эресей Федерацияны Правительствосуну 2021-чи джыл эндреуюк (декабрь) айны 16-да чыкъгъан «Об утверждении Правил аккредитации организаций, индивидуальных предпринимателей, оказывающих услуги в области охраны труда, и требований к организациям и индивидуальным предпринимателям, оказывающим услуги в области охраны труда» деген 2334-чю номерли бегиминде белгиленнген излемлеге кёре аккредитациялары болургъа керекди.
Урунууну къоруулаугъа юретиу бла аны юсюнден билимни ачыкълау производство чарпыулада кишини джарсытмазгъа, уруннган адамла усталыкълары бла байламлы ауруула бла аурумаз ючюн, алагъа джораланнган профилактика ишлени бириди. Аны ючюн, джангы джорукъланы таймаздан толтурургъа керекди.