Ётгюрлюкню ордени бла кеслерини джанларына къоркъуу бола тургъанлай, джамагъатны рахатлыгъын сакълар ючюн, аманлыкъчылагъа къаршчы кюрешни бардыргъан, адамланы къутхаргъан джигитле саугъаланадыла. Эдиланы Абу-Юсуфну джашы Алим, ма аллай, ётгюр джердешлерибизни бириди.
2012-чи джыл артто-тур (апрель) айны 9-да кюндюз 4 сагъат бла джарым бола РФ-ны КъЧР-де Чекчи управлениесини Морх элде заставасына Зеленчук районну коммунал ишчилери чегетде ишекли ары-бериси болгьан хызен кёргенлерин билдиргендиле.
Олсагьатлай огьуна ФСБ бла МВД-ны къуллукъчуларындан къуралгьан къауум ол хызенни ичинде неси болгьанына къараргьа чегетге атланнганды. Аны къурамында МВД-ны Экстремизмге къаршчы аралыгьыны оперуполномоченныйи Эдиланы Алим да болгьанды.
Чегетде коммунал ишчиле айтхан хызен эрлай огьуна табылгьанды. Аны ичинде ары-бериле аманлыкъчы адамны кереклери болгьаннга ушагьандыла. Кимники болгъанын, алайда не акъыл бла асыралгъанын ачыкъларгьа деб, оперативникле хызеннге тиймей, аны алыргьа келгенни сакъларгьа оноу этгендиле.
Кече сагъат 9 бола хызен болгьан джерге эрлай аны тутуб, машинагьа олтуртхандыла. Ала, аманлыкъчыны джёнгерлери болургъа боллугъуна ишек этиб, къарангыда къаугъа башланнгынчы, ол адамны полицияны бёлюмюне джетдирирге ашыкъгьандыла. Ашыкъгъанлары бла оперативникле ол адамны иги тинтерге да джетишмегендиле.
Эдиланы Алим машинаны джюрютюб, ол бирлери да аманлыкъчыны эки джанындан олтуруб, джолгъа чыкъгьандыла. Ол кёзюуде къатында олтургъан оперативникле аманлыкъчыны къол-ларына темир бугьоула салыргъа излеселе, ол герохун чыгъарыб, 3 анды. Алим ауур джаралы болуб тургъанлай, аманлыкъчыны излеми бла машинаны тохтатыргъа унамай, кесини сауутундан атыб, аны ёлтюргенди.
Артда ол аманлыкъчы сауутлу бандит къауумну къурамындан болгьаны ачыкъланнганды.
Къаугъада бир оперативник ёлгенди. Аллах рах-мат этсин.
Эдиланы Алим бла Чекчи управлениени бир къуллукъчусу ауур джаралары бла саулукъ сакълагъан учреждениеге тюшгендиле.
РФ-ны Президентини Указы бла Эдиланы Абу-Юсуфну джашы Алим, джанына къоркъуу бола тургъанлай, къуллукъ борчларын мийик дараджада толтуруб, аманлыкъчыны тыйгьаны, алай бла джамагъатны рахат джашауун сакълаугъа уллу юлюш къошханы ючюн, Ётгюрлюкню ордени бла саугъаланнганды. Арадан талай джыл ётсе да, Алим ол джарасындан тирилиб кетелмей, бюгюнлюкде кемизлилеге джораланнган коляскада айланады.
«Эт-джен адамларым кёл бериб, артда эс джыйгъан эдим ансы, эм алгъа бу халгьа тюшгеним бек ауур тийген эди. Бусагъатда кесими джунчутмайма, машина джюрютеме. Джумушларым бла Ростов, Москва шахарлагьа барыучанма. Юйдегим бла тенгиз джагъада да солуйма», -дейди Алим.
Алгьын заманы джетишмесе да, Алим джууукъгьа-тенгнге этден миллет ушхууурла этерге сюйюучен эди да, энди Эди улу кесин ол ишге бергенди. Бюгюнлюкде Алим юйдегиси бла бирге, кёбчюлюкге кавказ хантланы бишириб, сюйген иши бла да кюреше, хайыр тюшюреди.
Эдиланы Алим МВД-ны махтаулу ветераныды. Кеси да юй бийчеси Светлана бла бирге 3 ариу халили сабийни ёсдюргенди. Абадан джашы Малик, кёб болмай аскер къуллугъун толтуруб келиб, атасыча, МВД-ны къурамында ишлерге къагъытларын бергенди. Алимни экинчи джашы Азамат бла къызы Амира алкъын школгъа джюрюйдюле.
ТЕШЕЛЛЕУЛАНЫ Зульфия.
