Бизни республикада «Формирование комфортной городской среды» деген проектни джашаугъа сингдириуге кенг джол берилгенди.
Айтыргъа, бюгюнлюкде Черкесскеде 11 юйню арбазын джарашдырыу къызыудады, план бла белгиленнгенине кёре, юч арбазда инженер сетле бла коммуникацияланы да джангыртырыкъдыла.
Сёз ючюн, Ленин атлы орамны 52-чи номерли юйюнде арбазны джарашдырыб, джангы брусчатка салыб тебрегендиле.

Аны бла бирге арбазгъа джангы асфальт тёшерикдиле, кечеги чыракъла саллыкъдыла, сабий спорт майданчыкъ ишлерикдиле. Терекле орнатыугъа бютюн да аслам эс бёлюннюкдю. Аны бла да къалмай, бу арбазда сакъатлагъа не джаны бла да таб болурча этерге кюреширикдиле.
Проектде машинала тохтаучу джерни джарашдырыу да барды. Бюгюнлюкде джерни къазыу ишле тамамланнгандыла, бордюрла бла брусчаткаланы салыб башлагъандыла. Джангы асфальт эмда бетон тёшерге джерни джарашдырадыла.
Алай бла, республикада 33 арбаз джангыртыллыкъды, 6 джамагъат солугъан джер бла бир парк да къурар умут барды.