Украинада бардырылгъан спецоперациядан, ай медет, джюрекни джарсытхан хапарла да келиучендиле.

Адыге-Хабль районну Садовое элинде джашагъан Батдыланы Шахарбийни джашы Сеиталийни юйюн да джокълагъанды аллай хапар. Аны джашы Юрий Эресейни аскеринде контракт бла къуллукъ этгенди. Эки къралны арасында къаугъа чыкъгъанында, башха эресейчи аскерчиле бла баргъан эди спецоперациягъа. Ол снайпер-тахсачы бёлекде къуллукъ эте эди. Аскерчи тенглери бла тахсагъа барыб тургъанды. Бир кере уа, тахсагъа бара тургъанлай, аскерчи тенглери бла къуршоугъа тюшюб къалады. Украина джанында окъ-тоб атылыб, джашланы джунчутур ючюн къалмайды. Табсыз болумгъа тюшгенлерин аскерчи джашла ангылаб, артха турургъа излейдиле да, окъ-тоб тюшген джерден кетедиле. Алай бла джанларын ёлюмден къалдырадыла. Батдыланы Юрий а, атасы Сеиталийни айтханына кёре, ётлю джаш болгъанды, ол артха туракъламагъанды. Украина джанындан атылгъан ракета келиб Юрийни тюз къатына тюшеди да, атылады. Алай бла ётгюр таулу джаш быйылны элия (июль) айыны 22-де душман тобдан ёлюм табады.
Юрийни атасы Сеиталийге бушуу къагъыт элия айны 24-де келгенди. Сеиталий джууукъ адамларын алыб, Дондагъы Ростов шахаргъа барыб, Юрийни ёлюгюн алыб келген эдиле. Аны элия айны 26-да Садовое элде асырайдыла.
Арадан талай кюн ётюб, РФ-ны Президенти В. Путинни Бегими бла, Батдыланы Сеиталийни джашы Юрий Ётгюрлюкню орденине тыйыншлы болады.
Абыстол (ноябрь) айны 16-да Юрийни атасы Сеиталий бла анасы Раисаны Адыге-Хабль районну администрациясына чакъырыб, джашлары Юрийни Ётгюрлюкню орденин алагъа бердиле.
Орденни бериуге аталыб районну администрациясыны залында джыйылыу болду. Ары талай адам келген эди, аланы арасында КъЧР-ни аскер комиссарыны орунбасары Владимир Скоморох да бар эди. Джыйылыуда Адыге-Хабль районну администрациясыны башчысыны борчларын толтургъан Мухтар Астежев Батдыланы Юрийни юсюнден талай иги сёз айтханындан сора, КъЧР-ни аскер комиссарыны орунбасары Владимир Скоморох ёрге туруб, Ётгюрлюкню орденин да къолуна алыб, былай айтды:
- Батдыланы Сеиталийни джашы Юрий бюгюн бизни арабызда болмаса да, ол бизни эсибизде ёмюрлюкге къалыб, джаш тёлюге юлгю болуб турлукъду. Ол керти да ёхтем, джигит, батыр джаш болгъанды. Душман тобдан ёлеме деб къоркъмай, орнундан тебмегенди. «Ёлсем да, артха атлам этмейим» деб ёлгенди. Ма аллай джигитлиги ючюн Ётгюрлюкню орденине тыйыншлы болгъанды. Билеме, ата-анагъа баласын тас этген бир да ауур тиеди. Сиз, Юрийни атасы бла анасы, ашхы уланны ёсдюргенсиз. Бушууугъуз уллу болса да, Юрий бла ёхтемленирге боллукъсуз. Джашыгъызны орденин сизге бере, экигизге да саулукъ-эсенлик, узакъ ёмюр теджейме…
Джыйылыудан сора мен Юрийни атасы Сеиталий бла джашыны юсюнден ушакъ этдим.
- Юрийни баш билими бар эди, - дейди Сеиталий. – Усталыгъы бла юрист эди. Усталыгъынг бла ишле дегенимде: «Огъай, мен Эресейни аскеринде къуллукъ этерге сюеме», - деб джууаб берген эди. Ол контракт бла къуллукъ эте эди. Эресей бла Украинаны арасында къаугъа башланнганында, аны Донбассха джиберген эдиле. Ол снайпер-тахсачы эди. Телефон бла бизге кюн сайын дегенча сёлешгенлей тура эди.
Беш сабийим барды – Полина, Сослан, Солтан, Мадина, Юрий. Бары да уллула болгъандыла, юйленнгендиле. Юрийге 36 джыл болгъан эди. Аны эки джашы барды: 13 джыл болгъан Динислам бла 10 джыл болгъан Тимур. Экиси да школгъа джюрюйдюле. Юй бийчем бла мен пенсионерлебиз. Садовое элде джашайбыз. Буйрукъдан бир киши да къутулалмайды. Юрий душман къолдан ёлген эсе да, сый бла ёлгенди. Аны джигитлиги, ёхтемлиги джюрегиме себеб бола, бушуууму бир кесек унутаракъ да болуучанма…

КЪОБАНЛАНЫ Махмут.

 
{jcomments}